Búgin ShQO-da úsh orman órti tirkeldi
ASTANA.KAZINFORM — 20 tamyzda Respýblıka boıynsha 3 orman órti tirkeldi. Bul týraly Ekologııa jáne tabıǵı resýrstar mınıstrligi málim etti.
Vedomstvonyń dereginshe, Shyǵys Qazaqstan oblysynda — 2 órt tirkelse, Katonqaraǵaı — 1 órt bolǵan.
Orman alqaptaryndaǵy órt jaǵdaılary RMQK «Qazavıaormanqorǵaý» mamandarynyń áýeden baqylaýy jáne memlekettik orman kúzeti qyzmetkerleriniń jerdegi kezekshilik jumystary barysynda der kezinde anyqtalǵan.
— Órt oshaqtaryna jedel túrde tıisti kúshter men quraldar jiberilip, olardy joıý jumystaryna orman sharýashylyǵy mamandary, RMQK «Qazavıaormanqorǵaý» qyzmetkerleri jáne arnaıy órt sóndirý tehnıkasy qatystyryldy, — delingen habarlamada.
Qazirgi tańda órttiń taralýyna jol bermeý, oshaqtardy oqshaýlaý jáne tolyǵymen sóndirý sharalary atqarylyp jatyr.
Mamandar órt qaýpi joǵary kezeńde tabıǵı aýmaqtarǵa shyǵatyn turǵyndardan qaýipsizdik talaptaryna erekshe mán berýdi eskertti. Tabıǵatta ot jaǵý kezinde saqtyq tanytyp, sóndirilmegen otty qaldyrmaý jáne órttiń aldyn alýǵa baǵyttalǵan barlyq qajetti sharalardy saqtaý mańyzdy ekeni aıtylǵan.
Aıta keteıik, keshe de Shyǵys Qazaqstanda orman órti tirkelgen bolatyn.
