Búgin Prezıdenttik jastar kadr rezervine ótinim berýdiń sońǵy kúni
Prezıdenttik jastar kadr rezervine qabyldaný úshin ótinim berý merzimi aıaqtalýǵa jaqyn. Naqty aıtqanda qujattardy – 30 qyrkúıek saǵat 23:59-ǵa deıin (pkrezerv.gov.kz saıtyna) ótkizýge bolady. QazAqparat bul týraly Memlekettik qyzmet isteri agenttiginiń baspasóz qyzmetine silteme jasap habarlaıdy.
Rezervke irikteý 2023 jyldyń 1 qyrkúıeginde bastaldy. Oǵan keminde bes jyl jumys tájirıbesi jáne memlekettik tildi B1 deńgeıinen tómen emes meńgergen, 35 jasqa deıingi Qazaqstan Respýblıkasynyń azamattary qatysa alady.
Úmitkerlerge qazaq tilin bilýden testileýden ótý úshin Qazaq resmi Test (onlaın) promokodyn alý 2023 jylǵy 30 qyrkúıek saǵat 13.00-ge deıin, testileýdi tapsyrý saǵat 17.00-ge deıin qoljetimdi.
Іrikteý sharttary boıynsha kandıdattar 30 qyrkúıekke deıin barlyq qujattardy júkteýdi aıaqtap, 1 qazanda ótetin irikteýdiń kezeńi – «Testileý – mátindik aqparatpen jumys isteý qabiletin baǵalaýǵa» jazylýy qajet.
Testileýge jazylý 30 qyrkúıek saǵat 23:59-ǵa deıin ashyq bolady. Testileý proktorıng júıesin qoldana otyryp, onlaın rejımde ótedi, sondaı-aq aýdıo jáne beınejazbamen súıemeldenedi.
Eskertilip ótkendeı, úmitkerlerge jumys ornynan turyp ketýge nemese bireýmen kelissózder júrgizýge, ózimen birge qabyldaýshy-berýshi elektrondyq qurylǵylardy (onyń ishinde uıaly telefondar men ózge de elektrondyq jabdyqtardy), qulaqqaptar, qaǵaz jetkizgishterdiń bolýyna tyıym salynady.
Sondaı aq qatysýshylar óz tarapynan kelesilerdi qamtamasyz etýi qajet:
- Chrome braýzeri bar kompıýter/noýtbýk;
- turaqty jáne jyldamdyǵy keminde sekýndyna 5 mb ınternet;
- jumys isteıtin veb-kamera, mıkrofon jáne jetkilikti deńgeıde kórinýge múmkindik beretin jaryq bolýy;
- bógde dybystyń/shýdyń bolmaýy.
Mátindik testileýden ótý máseleleri týraly beınenusqaýlyqpen kelesi silteme arqyly tanysýǵa bolady: Test 25 tapsyrmadan turady, uzaqtyǵy 25 mınýttan aspaıdy.
Nátıjelerdi esepteý testileý aıaqtalǵannan keıin kompıýter monıtorynda birden shyǵady. Jınalǵan upaılar jeke kabınette «habarlamalar» bóliminde kórsetiledi.
Úmitkerlerdi baǵalaý nátıjeleri olardyń jeke kabınetterinde jáne pkrezerv.gov.kz saıtynda ornalastyrylady.
