Búgin Ózbekstannyń «Samarkand — 2028» spýtnıgi ǵarysh keńistigine shyǵarylady
TAShKENT. KAZINFORM — 5 tamyzda Ózbekstannyń «Samarkand — 2028» gıperspektrlik jerserigi orbıtaǵa shyǵarylmaq, dep habarlaıdy Kazinform agenttiginiń Tashkenttegi menshikti tilshisi.
«Ózbekǵarysh» agenttiginen málimdegendeı, spýtnık Qytaıdyń Shandýn provıntsııasy jaǵalaýynda ornalasqan ǵarysh aılaǵynan kókke kóteriledi. «Samarkand — 2028» apparatymen qatar «Lampung-1» jerserigin de orbıtaǵa shyǵarý kózdelip otyr.
Bul jobany júzege asyrý «STAR.VISION» kompanııasyna júktelgen. Daıyndyq jumystary bekitilgen kestege sáıkes júrgizildi.
Tıisti memorandýmǵa «Ózbekǵarysh» agenttigi men qytaılyq «STAR.VISION» kásiporny 2025 jyly jeltoqsanda qol qoıǵan. 2028 jyly Samarqandta uıymdastyrylatyn Halyqaralyq astronavtıka kongressiniń qurmetine oraı, spýtnıkke «Samarqand-2028» ataýy berilgen.
Kelisimge sáıkes, Jerdi qashyqtan zondtaý jerserigine arnalǵan jasandy ıntellekt modýlin «Ózbekǵarysh» agenttiginiń mamandary ázirledi. Spýtnık aýa sapasyn baqylaý, dándi-daqyldardyń ónimdiligi men orman alqaptaryndaǵy jaǵdaıdy qadaǵalap otyrýǵa múmkindik beredi. Keıin onyń kómegimen jasalǵan sýretterge agenttik mamandary taldaý jasap, aqparatty jaýapty vedomstvolarǵa joldap otyrady.
Buǵan deıin habarlaǵanymyzdaı, 2027 jyly ǵaryshqa shyǵarylatyn túrki elderiniń birlesken spýtnıgi Tashkentte tanystyryldy.
Sondaı-aq, Ózbekstan 2028 jyly «Mirzo Ulug’bek» spýtnıgin ǵarysh keńistigine shyǵarady.
