Almaty men Talǵar arasyndaǵy LRT jelisi: joba qaı satyda

ALMATY. KAZINFORM – Almaty men Talǵar arasynda LRT jelisi júrgizilýi múmkin be? Bul suraqqa Almaty oblysynyń ákimdigi jaýap berdi.

2023 jyly Almaty men Qonaevty baılanystyratyn LRT jelisin salý jobasy jarııalanǵan bolatyn. Sol kezde oblys ákimi Marat Sultanǵazıev jobanyń ınvestory sanalǵan túrkııalyq Tasyapi kompanııasymen yntymaqtastyq týraly memorandýmǵa qol qoıdy. 

Aldyn ala derekter boıynsha Qonaevtan bólek Talǵar, Eńbekshiqazaq, Qarasaı aýdandaryn qamtıtyn jeliniń jalpy uzyndyǵy shamamen 146 shaqyrym bolýy tıis edi. Kún saıyn óńirde turatyn 500 myń adam megapolıske qatynap, jol ınfraqurylymyna túsetin júktemeni azaıtýǵa yqpal etedi dep kútildi.

Kazinform agenttigi jobanyń qazir qandaı satyda ekenin anyqtaý úshin oblystyq jolaýshy kóligi jáne avtomobıl joldary basqarmasyna resmı saýal joldady.

Vedomstvo málimetinshe, túrkııalyq Tasyapi Insaat kompanııasy «Almaty – Talǵar» baǵyty boıynsha uzyndyǵy 18 shaqyrymdyq pılottyq jeńil relsti kólik jobasyn júzege asyrýdy usynǵan.

— Jeńil relsti kólik jobasy qarjylyq sharttardyń sáıkessizdigine baılanysty toqtatyldy. Jobanyń aýqymyn eskere otyryp, bul másele aldaǵy ýaqytta respýblıkalyq deńgeıde talqylanatyn bolady, — dep habarlady basqarmadan.

Sonymen qatar óńirdiń kólik baılanysyn jaqsartýǵa múmkindik beretin qoǵamdyq kóliktiń balamaly túrlerin qarastyrý jumystary qatar júrgizilip jatqany atap ótildi. Resmı jaýapqa sáıkes, óńirdegi jol-ınfraqurylym jobalaryna halyqaralyq ınvestorlardyń qyzyǵýshylyǵy saqtalyp otyr.

Eske salaıyq, buǵan deıin Almatyda úsh baǵytta metronyń 23 beketi salynatynyn jazǵanbyz.