Búgin – Otan qorǵaýshy kúni

1992 jyly 7 mamyrda Qazaqstan Respýblıkasy Prezıdentiniń Qarýly kúshterdi qurý týraly №745 Jarlyǵy jarııalandy. Jarlyqta otandyq qarýly kúshti qalyptastyryp, ol úshin tıisti jaǵdaı jasaý kerektigi aıtylǵan. Bul – el tynyshtyǵyn qorǵap, beıbitshilikti qamtamasyz etetin áskerı qyzmetshilerdi quttyqtap, qurmet kórsetetin kún.

Aıta keteıik, Qazaqstan Qarýly kúshter qatarynda er azamattarmen qatar, názik jandar da teńdeı qyzmet atqaryp keledi. Olardyń kópshiligi ofıtser ataǵyna ıe. Sondyqtan, Otan qorǵaýshy kúni – áskerı saladaǵy qyz-kelinshekterdiń de merekesi.

Qazaqstan áskeri qurylymynda qurlyq áskerleri, áýe qorǵanysy áskerleri jáne áskerı-teńiz kúshteri qamtylǵan.

2012 jyly 7 mamyr memlekettik mereke bolyp jarııalandy jáne demalys kúni sanalady. Ataýly kún qarsańynda eńbegi sińgen sala mamandaryna áskerı ataqtar berý jáne erekshe kózge túsken áskerı qyzmetshilerge nagradalar tapsyrý dástúrge aınalǵanyn atap ótý qajet.

Osy oraıda 6 mamyr kúni Aqordada Otan qorǵaýshy kúnine oraı merekelik is-shara ótti. Memleket basshysy – Qazaqstan Qarýly Kúshteri Joǵarǵy Bas Qolbasshysy Qasym-Jomart Toqaev sardarlar men sarbazdardy Otan qorǵaýshy kúnimen jáne Jeńis kúnimen quttyqtady.

– Qos merekeniń mán-mazmuny – úndes, taǵylymy – ortaq. Osy meıramdarda elimizdiń erlik dástúri keńinen dáripteledi. Biz bul kúnderi jurtymyzǵa qorǵan bolyp júrgen erlerge qurmet kórsetemiz. Sondaı-aq surapyl soǵysta Otan úshin ot keshken batyrlardyń rýhyna taǵzym etemiz. Qazaq – shekarasyn aq naızanyń ushymen, aq bilektiń kúshimen bekemdegen qaharman halyq, erjúrek ult. Batyr babalarymyz el taǵdyry synǵa túsken sátte bir Týdyń astyna jınalǵan. Birligin nyǵaıtyp, jurtyn jaýdan qorǵaǵan. Baıtaq dalany kózdiń qarashyǵyndaı saqtap, urpaqqa amanat etken. Osy amanatqa adal bolý – bizdiń qasterli boryshymyz. Birtutas Qazaqstan halqy muny jaqsy túsinedi. Naýryz aıyndaǵy konstıtýtsııalyq reforma – sonyń aıqyn dáleli. Saıası naýqan kezinde biz eń aldymen óskeleń urpaq aldyndaǵy jaýapkershilikti tereń sezine otyryp, tarıhı tańdaýymyzdy jasadyq. Bárimiz bir el bolyp, jańa Konstıtýtsııany qabyldadyq. Muny ult bolashaǵyna tikeleı yqpal etetin asa mańyzdy sheshim desek, qate bolmaıdy, - dedi Prezıdent.

Memleket basshysy búgingi tańda armııany zaman talabyna saı nyǵaıtyp, elimizdiń qorǵanys qabiletin arttyrýǵa qajetti barlyq shara qabyldanyp jatqanyna nazar aýdardy.

– Qaýipsizdik máseleleri, elimizdiń qorǵanys qabiletin kúsheıtý, qyzmetterdiń bedelin kóterý – negizgi memlekettik basymdyqtar men mindetter. Keıingi jyldary áskerı qyzmetshilerge, quqyq qorǵaý jáne arnaýly organdar qyzmetkerlerine keńinen qoldaý kórsetilip keledi, - dedi Qasym-Jomart Toqaev.

Aıta keteıik, Astanada bul merekege oraı áskerı qyzmetti nasıhattaýǵa jáne patrıottyq qundylyqtardy nyǵaıtýǵa baǵyttalǵan mazmundy baǵdarlama ótedi.