Búgin Oralda fýtzaldan Qazaqstan sýperkýbogy ótedi

ASTANA. KAZINFORM — Búgin fýtzaldan Qazaqstan sýperkýbogy Oral qalasynda ótedi 

Fýtzaldan elimizdegi jańa maýsym Oral qalasynda ótetin sýperkýbok matchymen resmı túrde bastalady. Onda el chempıony almatylyq «Qaırat» pen Qazaqstan Kýbogynyń ıegeri «Semeı» komandalary ózara myqtyny anyqtaıdy.

Bul kezdesýdiń ereksheligi fýtzal tarıhynda alǵash ret Sýperkýbok oıyny Batys Qazaqstan oblysynda ótkiziledi. Komandalar jańa ári zamanaýı sport kesheninde sheberlik baıqasady.

Byltyr elimizdiń sýperkýbogy fınalynda «Qaırat» «Semeıdi» 3:1 esebimen tize búktirip, jeńimpaz atanǵan edi.

«Qaırat» buǵan deıin óz tarıhynda 11 márte sýperkýbok alǵan. Almatylyq klýbtan keıin eki ret «Aqtóberentgen» komandasy ıelengen. Tipti «Tulpardyń» ózi bul júldeni bir-aq ret jeńgen.