Búgin - medıtsına qyzmetkeri kúni
ASTANA. KAZINFORM – Búgin Qazaqstannyń medıtsına salasynyń ókilderi kásibı merkelerin atap ótedi. Elimizde maýsymnyń ər úshinshi jeksenbisi – medıtsına qyzmetkerleriniń kúni. Bul kúndi atap ótý QR Prezıdentiniń 1998 jylǵy Jarlyǵymen belgilendi.
Osyǵan oraı Aqordada Memleket basshysy elimizdiń medıtsına qyzmetkerlerin kásibı merekesimen quttyqtady.
Prezıdenttiń Jarlyǵymen otandyq medıtsınany damytýǵa eleýli úles qosqan mamandar marapattaldy.
– Rasynda, dáriger bolý – júrektiń isi. Bul – ekiniń biri aıaq basa bermeıtin júgi aýyr, kúrdeli jumys. Medıtsına qyzmetkerleri – ult saýlyǵynyń saqshylary, eń qadirli mamandyq ıeleri. Ásirese, jahandyq indet, ıaǵnı kovıd kezinde búkil el dárigerlerdiń adal qyzmetine kýá boldy. Kúrdeli kezeńde medıtsına mamandary myńdaǵan adamdy qutqaryp qaldy. Biz abzal jandardyń tabandy eńbegin baǵalaımyz. Olardyń qaısarlyǵyn maqtan tutamyz. «Bir adamnyń ómirin qutqarý barsha adamzatty qutqarýmen birdeı». Dárigerler ota kezinde, aýrýhana palatasynda kún saıyn erlik jasaıdy desek, artyq bolmaıdy. Jedel járdem kóliginde adam ómirine arasha túsetin sátter bolady. Sondyqtan sizder, qurmetti medıtsına qyzmetkerleri, beıbit kúnniń batyrlary degen atqa laıyqsyzdar. Men barsha medıtsına mamandaryna zor rızashylyǵymdy bildiremin, – dedi Qasym-Jomart Toqaev.
Búginde elimizdiń densaýlyq saqtaý salasynda 380 myńǵa jýyq adam jumys isteıdi. Ár mamannyń eńbegi orasan zor. Ult saýlyǵyn saqtaýǵa búkil ómirin arnaǵan tutas áýletter bar.
Jyl saıyn 45 memleketten shamamen 10 myń adam Qazaqstanǵa emdelý úshin arnaıy keledi. Bul elimizdegi dárigerlik kómektiń sapasy joǵary ekenin kórsetedi.
Aıta keteıik, elimizde ortasha ómir súrý uzaqtyǵy 75,4 jasqa jetti. Medıtsınalyq nysandar qatary kóbeıip, tehnıkalyq bazasy nyǵaıtylyp jatyr.
- Bes jylda 800-ge jýyq densaýlyq saqtaý nysany, ıaǵnı kóptegen emhana men aýrýhana salyndy. Bul jumys toqtamaıdy, memleket aldaǵy ýaqytta da ınfraqurylymdy damyta beredi. Ult saýlyǵyn jaqsartý alǵashqy medıtsınalyq kómekten bastalady. Elimizde aýyldyq jerdegi medıtsına júıesin jańǵyrtýǵa arnalǵan ulttyq joba júzege asyrylyp jatyr. Búginde 469 ǵımarat boı kóterdi. Jyl sońyna deıin taǵy 186 nysan salynady. Aýdandyq aýrýhanalar zamanǵa saı quraldarmen jabdyqtalyp jatyr, – dedi Prezıdent.
Prezıdenttiń tapsyrmasymen byltyrdan bastap «Qazaqstannyń eńbek sińirgen dárigeri» ataǵy berile bastady. Bul – medıtsına qyzmetkerlerine degen aıryqsha qurmettiń belgisi. Osy oraıda Abaı Baıgenjın elimizde alǵash bolyp «Qazaqstannyń eńbek sińirgen dárigeri» ataǵyn aldy.