Búgin – Mashına jasaýshylar kúni
ASTANA. KAZINFORM - Búgin elimizde Mashına jasaýshylar kúni atalyp ótedi. Kásibı mereke alǵash ret 1981 jyly KSRO kezinde toılanǵan. Keńes odaǵy taraǵannan keıin bul merekeni Belarýs, Qyrǵyzstan, Reseı elderi de óz kúntizbelerinde qaldyrdy.
2017 jylǵy 31 qazanda QR Úkimetiniń «Qazaqstan Respýblıkasyndaǵy merekelik kúnderdiń tizbesin bekitý týraly» №689 qaýlysymen qyrkúıektiń sońǵy jeksenbisi Mashına jasaýshy kúni retinde bekitilgen.
Mashına jasaý – el ekonomıkasynyń mańyzdy salalarynyń biri. Ony qarqyndy damytý – elimizdiń óńdeý ónerkásibin damytý tujyrymdamasynyń negizgi basymdyqtarynyń biri. Bul tek avtomobıl óndirisin ǵana emes, elektr, temirjol jabdyqtaryn, taý-ken munaı-gaz, aýyl sharýashylyǵy mashınalary syndy kúrdeli 40-qa jýyq salany qamtıdy. Bul salada shamamen 120 myńǵa jýyq adam eńbek etedi.
Byltyr elimizde Mashına jasaý salasyn damytýdyń 2024-2028 jyldarǵa arnalǵan keshendi jospary Qazaqstan Respýblıkasy Úkimetiniń qaýlysymen bekitildi. Qujat aýyl sharýashylyǵy, temirjol, energetıka jáne elektrotehnıka, taý-ken-metallýrgııa jáne munaı-gaz mashına jasaý, avtomobıl men avıaqurylystaǵy problemalardy odan ári sheshýge, qoldanystaǵy óndiristerdiń tıimdiligi men básekelestik artyqshylyqtaryn arttyrýǵa, salyq bazasyn joǵarylatý, álemdik ekonomıkaǵa ýaqtyly qosylýǵa múmkindik beredi.
Sondyqtan keshendi jospar otandyq ekonomıka úshin strategııalyq mańyzǵa ıe. Bul qujat otandyq óndirýshilerdi qoldaýǵa jáne eldiń mashına jasaý salasynyń básekege qabilettiligin arttyrýǵa baǵyttalǵan. Keshendi jospar QR «Ónerkásiptik saıasat týraly» Zańyn praktıkalyq iske asyrý máselelerin, eldiń 2025 jylǵa deıingi ulttyq damý josparynyń negizgi erejelerin, óńdeý ónerkásibin damytýdyń 2023-2029 jyldarǵa arnalǵan tujyrymdamasyn, Memleket basshysynyń el ekonomıkasyn ártaraptandyrý jáne ındýstrııalandyrý jónindegi tapsyrmalaryn eskere otyryp ázirlengen.
«Qazaqstan mashına jasaýshylar odaǵy» ZTB dereginshe, mashına jasaý salasyndaǵy negizgi mamandar boıynsha 2024 jyldan 2028 jylǵa deıin qajettilik 7 myńnan astam adamdy quraıdy. Keshendi josparda mashına jasaý salasyndaǵy dýaldy oqýdy damytý boıynsha eýropalyq tájirıbeni zerdeleý, tehnıkalyq jáne kásiptik orta bilimnen keıingi bilim berýdi uıymdastyrýda ozyq tájirıbeni odan ári engizý jónindegi is-sharalar qarastyrylǵan. Al jospardyń ózin qarjylandyrýǵa bıýdjetten 1,4 trln teńge qarastyrylǵan.
