Búgin kúres túrlerinen 20 jasqa deıingiler arasynda álem chempıonaty bastalady

ASTANA. KAZINFORM - Búgin Bolgarııanyń Samokov qalasynda 20 jasqa deıingiler arasynda kúres túrlerinen álem chempıonatynda balýandar baq synaıdy. 

17-24 tamyz aralyǵynda ótetin bedeldi básekede qazaqstandyq balýandar áıelder kúresinen, grek-rım jáne erkin kúresten el namysyn qorǵaıdy. Aldymen erkin kúres sheberleri boz kilemge shyqsa, odan keıin áıelder kúresinen júldeler sarapqa salynady.

Álem chempıonatyn grek-rım kúresiniń balýandary túıindeıdi.

Dúnıejúzilik doda 1969 jyldan beri turaqty túrde ótkizilip keledi. Qazirge deıin qazaqstandyq balýandar 10 altyn, 27 kúmis, 39 qola medal aldy. 

Byltyr Ispanııanyń Pontevedre qalasynda ótken álem chempıonatynda el quramasy 2 altyn, 1 kúmis, 4 qola júldemen medaldar kestesinde tórtinshi orynǵa turaqtady.

Álemdik dodada Qazaqstan áıelder quramasynyń atynan toǵyz balýan óner kórsetedi. Olardyń qatarynda Meıramgúl Ahmetjan (50 keli), Alıana Mahambetova (55 keli), Anna Stratan (57 keli), Ánel Shoqabaeva (59 keli), Aıdana Shoraeva (62 keli), Qyz-Jibek Jarqynbaeva (65 keli), Sabına Tóreı (68 keli), Meıramgúl Maqsot (72 keli) pen Alına Ertóstik (76 keli) bar.

Sondaı-aq álem chempıonatynda grek-rım kúresinen el quramasy sapynda baq synaıtyn balýandardyń esimi belgili boldy. Bapkerler Arsen Juma (55 keli), Salamat Muratuly (60 keli), Damır Ibrashov (63 keli), Álibek Turlyǵazy (67 keli), ıÝsýf Ashrapov (72 keli), Aqjan Yqylasov (77 keli), Dıas Seıitqalıev (82 keli), Temirlan Turdaqyn (87 keli), Nurasyl Amanaly (97 keli), Qýanysh Amangeldi (130 keli) syndy sportshylarǵa senim bildirdi.

Al erkin kúresten Nurdanat Aıtanov (57 keli), Allan Oralbek(61 keli), Eraly Jeńisov (65 keli), Suńqar Seıdahmet (70 keli), Dosjan Qul-Ǵaıyp, (74 keli), Erhan Ábil (79 keli), Qasymjomart Álın (86 keli), Kamıl Kýrýglıev (92 keli), Samır Dýrsýnov (97 keli), Edige Qasymbek (125 keli) el namysyn qorǵaıdy.

Eske salsaq, budan buryn qazaq kúresinen álem chempıonatynda áskerı qyzmetshileri 4 altyn medal jeńip aldy.