Búgin kún raıy qandaı bolady
ASTANA. KAZINFORM – «Qazgıdromet» RMK sınoptıkteri 17 shildege arnalǵan aýa raıy boljamyn jarııalady.
Atmosferalyq fronttardyń ótýine baılanysty respýblıka aýmaǵynyń basym bóliginde turaqsyz aýa raıy saqtalady, jańbyr jaýyp, naızaǵaı oınaıdy. Eldiń batysynda, soltústiginde jáne shyǵysynda kúndiz burshaq jaýýy múmkin. Batys pen shyǵysta daýyl turýy yqtımal. Al eldiń ońtústiginde antıtsıklon yqpalymen jaýyn-shashynsyz aýa raıy saqtalady. Respýblıka boıynsha jeldiń kúsheıýi kútiledi.
Kúndiz Aqmola, Pavlodar, Atyraý, Almaty, Jambyl, Aqtóbe, Batys Qazaqstan, Qaraǵandy, Abaı, Jetisý, Ulytaý oblystarynda, sondaı-aq Qostanaı oblysynyń ońtústiginde, Shyǵys Qazaqstan oblysynyń ońtústiginde qatty ystyq 35–39 gradýsqa deıin jetedi. Qyzylorda men Túrkistan oblystarynyń batysy men shóldi aımaqtarynda 40–43 gradýs aptap ystyq bolady. Mańǵystaý oblysynda kúndizgi temperatýra 38–40 gradýsqa deıin kóteriledi.
Aqtóbe oblysynyń ońtústiginde kún 40 gradýsqa deıin ysıdy, Almaty oblysynyń batysy, soltústigi men ortalyǵynda, Jetisý oblysynyń shyǵysynda óte qatty ystyq – 42 gradýsqa deıin bolady.
Batys Qazaqstan, Atyraý oblysynyń batysy men ortalyǵy, Abaı oblysynyń soltústik-batysy men ortalyǵy, Qostanaı oblysynyń ońtústik-shyǵysy, Aqtóbe oblysynyń soltústigi, batysy jáne shyǵysy, Qaraǵandy oblysynyń soltústigi men shyǵysy, Ulytaý oblysynyń soltústik jartysy, Aqmola oblysynyń batysy, soltústigi jáne ońtústigi, Pavlodar men Shyǵys Qazaqstan oblystarynyń ońtústiginde joǵary órt qaýpi saqtalady.
Mańǵystaý, Qyzylorda, Túrkistan, Almaty oblystarynda, Jetisý oblysynyń ońtústik-shyǵysynda, Jambyl oblysynyń batysy, shyǵysy jáne ońtústiginde, Atyraý oblysynyń soltústigi, shyǵysy jáne ońtústiginde, Qaraǵandy oblysynyń batysy men ońtústiginde, Aqtóbe oblysynyń ortalyǵy men ońtústiginde, Qostanaı oblysynyń ońtústik-batysynda, Ulytaý oblysynyń ońtústik jartysynda jáne Abaı oblysynyń ońtústiginde óte joǵary — tótenshe órt qaýpi boljanyp otyr.
Aıta ketelik Qazaqstannyń 14 óńirinde 43 gradýsqa deıin aptap ystyq bolýy múmkin ekenin jazǵan edik.