Búgin QPL-da 8-týrdyń ekinshi oıyn kúni ótedi

ASTANA. KAZINFORM — Búgin fýtboldan Premer-lıga komandalary arasyndaǵy Qazaqstan chempıonaty 8-týrynyń ekinshi oıyn kúni ótedi.

Búgin, 11 mamyrda 15.00-de «Jetisý» (Taldyqorǵan) men «Oqjetpes» (Kókshetaý) oınasa, 17.00-de «Ordabasy» (Shymkent) men «Qaısar» (Qyzylorda), 19.00-de «Aqtóbe» men «Elimaı» (Semeı) sheberlik baıqasady.

Atalǵan týrdyń alǵashqy oıyn kúni, 10 mamyrda elordalyq «Astana» óz alańynda qostanaılyq «Tobyldan» 1:3 esebimen jeńilip qaldy. 

Kezdesý barysynda qostanaılyq klýbtan Ahmed El-Messaýdı 8-mınýtta esep ashsa, odan keıin Nıkolaı Sıgnevıch 16, 36-mınýtta eki gol soǵyp ketti. Oǵan elordalyq klýbtan 87-mınýtta Djeffrı Chınedý bir golmen jaýap qaıyrdy. 

Osylaısha «Astana» qatarynan eki týr boıy jeńiske jete almaı keledi. 
Sondaı-aq atalǵan týrda petropavldyq «Qyzyljar» óz alańynda jezqazǵandyq «Ulytaý» klýbyn 2:1, túrkistandyq «Turan» «Atyraýdy» 1:0 esebimen jeńdi.

Eske salsaq, Qazaqstan Premer-lıgasynyń aldyn ala ótken 20-týrynda elordalyq «Jeńis» almatylyq «Qaıratqa» ese jiberdi.