Búgin Konstıtýtsııalyq reformalar jónindegi komıssııanyń kezekti otyrysy jalǵasady
ASTANA. KAZINFORM – Búgin tústen keıin Konstıtýtsııalyq reformalar jónindegi komıssııanyń úshinshi otyrysy bastalady. Bul týraly búgin QR Konstıtýtsııalyq Sotynyń tóraǵasy Elvıra Ázimova málim etti.
Aıta keteıik, 24 qańtar kúni Astanada Konstıtýtsııalyq reforma jónindegi komıssııanyń alǵashqy otyrysy ótti.
Al búgin tańerteń bul komıssııanyń ekinshi otyrysy bastaldy.
Onyń barysynda úsh negizgi spıkerdiń baıandamalary tyńdalady — Ádilet mınıstri Erlan Sársembaevtyń, Senat depýtaty Nurlan Beknazarovtyń jáne Májilis depýtaty Snejanna Imashevanyń. Olar 2025 jyldyń qazan aıynan bastap túsken usynystar negizinde ázirlengen quqyqtyq tásilder men túzetýlerdi usyndy.
- Biz jalpy talqylaýdyń nysanasyna aınalýy tıis naqty quqyqtyq tujyrymdamalardy kórdik. Eske sala keteıin, bul usynystar - birneshe aı boıy júrgizilgen jumys pen ashyq qoǵamdyq talqylaýdyń nátıjesi. Sonymen qatar salystyrmaly kesteni qosymsha zerdeleý jáne toptyq talqylaý úshin komıssııa hatshylyǵy tıisti zaldar men tehnıkalyq quraldardy daıyndady. Sondyqtan biz búgingi jumysymyzdy toptyq otyrys túrinde ótkizeıik, - dedi E.Ázimova.
Osy oraıda ol qazir tehnıkalyq úzilisten keıin toptyq talqylaýlar ótetinin aıtty.
- Bul rette, birinshi top «Parlamenttik jáne ózge de ınstıtýtsıonaldyq ózgerister» máselelerin talqylaıdy. Oǵan Ádilet mınıstri Erlan Sársembaev jetekshilik etedi. Ekinshi top «Sot tórelegi salasyna qatysty ózgerister» blogyn qaraıdy. Talqylaýda moderator retinde Májilis depýtaty Snejanna Imasheva bolady. Úshinshi top «Preambýlanyń jalpy erejelerine, sondaı-aq adam quqyǵy men bostandyǵy týraly» bólimge qatysty jıyntyq kestede usynylǵan ózgeristermen jumys isteıdi. Bul talqylaýdy Konstıtýtsııalyq Sot tóraǵasynyń orynbasary Baqyt Nurmuhanov júrgizedi, - dedi Elvıra Ázimova.
Bul turǵyda dál qazir Konstıtýtsııalyq komıssııanyń músheleri jekelegen jumys sektsııalary aıasynda Negizgi zańǵa usynylǵan túzetýlerdi talqylaýǵa kiristi.
- Komıssııanyń kelesi otyrysy búgin saǵat 16:00-de bastalady. Osy otyrysta jıyntyq keste boıynsha sizderdiń pikirlerińizdi tyńdaımyz, - dedi QR Konstıtýtsııalyq Sotynyń tóraǵasy.
Tolyqtyryldy: Komıssııanyń úshinshi otyrysy bastalatyn ýaqyt 17:00-ge aýysty.