Búgin Qytaıda Dımashtyń halyqaralyq jobasynyń tusaýkeseri ótedi
ASTANA. KAZINFORM – 5 aqpanda Qytaı ýaqytymen saǵat 22:00-de (Astana ýaqytymen 19:00) Hunan TV telearnasynda Voice Beyond Horizon halyqaralyq jobasynyń resmı tusaýkeseri ótedi. Bul týraly Týrızm jáne sport mınıstrliginiń baspasóz qyzmeti jazdy.
Baǵdarlama Qazaqstanda 14 aqpanda Qazaqstan ulttyq telearnasynan kórsetiledi. Joba álemge tanymal otandyq ánshi Dımash Qudaıbergenniń bastamasymen Hunan Broadcasting System kompanııasymen birlese júzege asyryldy. Túsirilim jumystary tolyqtaı Qazaqstannyń týrıstik nysandarynda ótip, alty óńirdi qamtydy: Túrkistan, Mańǵystaý, Almaty jáne Aqmola oblystary, sondaı-aq Astana men Almaty qalalary.
Jobaǵa Qazaqstan, Qytaı, Qyrǵyzstan, Italııa, Malaızııa jáne Serbııa elderinen kelgen talantty oryndaýshylar qatysty.
Voice Beyond Horizon jobasy Qazaqstannyń tabıǵı baılyǵy men týrıstik áleýetin mıllıardtaǵan kórermenge tanystyrady. Kórermender kóne Túrkistandy, Bozjyranyń aıbyndy kórinisterin, Kaspıı teńizi jaǵalaýyn, Qaıyńdy men Kóbeıtuz kólderin, Saty týrıstik aýylyn, Qapshaǵaı sý qoımasyn, sondaı-aq Şýchınsk–Býrabaı kýrortty óńirin tamashalaıdy.
– Kazakh Tourism UK AQ halyqaralyq medıa-jobalar arqyly Qazaqstannyń týrıstik áleýetin júıeli túrde damytyp keledi. Biz Euronews Travel, Amazon Prime Video sekildi jetekshi álemdik platformalarmen jáne telearnalarmen seriktestik ornatyp jatyrmyz. Qazaqstannyń týrıstik nysandaryn mıllıardtaǵan halyqaralyq aýdıtorııaǵa tanytatyn Voice Beyond Horizon jobasy úshin Dımash Qudaıbergenge alǵys bildiremiz, - dedi Kazakh Tourism UK AQ Basqarma tóraǵasy Talǵat Ǵazızov.
Aıta keteıik, Hunan TV telearnasynyń aýdıtorııasy 1,9 mıllıardtan asady. Joba Mango TV tsıfrlyq platformasynda da kórsetiledi.
Voice Beyond Horizon halyqaralyq jobasyna Kazakh Tourism UK AQ, Týrızm jáne sport mınıstrligi, Mádenıet jáne aqparat mınıstrligi, Astana men Almaty qalalarynyń, sondaı-aq Almaty, Aqmola, Túrkistan jáne Mańǵystaý oblystarynyń ákimdikteri qoldaý kórsetti. Joba demeýshileri – Qarmet, «Qazaqmys», «AltynAlmas» kompanııalary jáne Nurlan Smaǵulov qory.
Buǵan deıin Dımash Qudaıbergenniń «Voice Beyond Horizon» shoýynyń qatysýshylaryn tanystyrǵanyn jazǵan edik.