Búgin Qyrǵyzstanda saılaý aldyndaǵy «tynyshtyq» kúni bastaldy
ASTANA. KAZINFORM — Qyrǵyzstanda Jogorký Kenesh depýtattarynyń merziminen buryn ótetin saılaýyna sanaýly kúnder qaldy. Saılaý kúni 30 qarashaǵa belgilengen, dep habarlaıdy Kabar.
30 saılaý okrýginde úmitkerlerdiń úgit-nasıhat kampanııasy 10 qarashada bastalǵan. Al 29 qarashada saılaý ýchaskeleri ashylýǵa 24 saǵat qalǵanda úgit-nasıhat jumystary toqtatylady. Sondaı-aq, dál osy kúni saılaý ýchaskelerinen tys daýys berý bastalady.
Іshki ister mınıstrliginiń málimeti boıynsha, tynyshtyq kúninde zańbuzýshylyqtardyń aldyn alý úshin 10 myńnan astam quqyq qorǵaý qyzmetkeri kúsheıtilgen rejımde qyzmet etedi.
Qyrǵyzstanda Jogorký Kenesh depýtattarynyń saılaýyna 30 saılaý okrýgi quryldy. Ár okrýgten 3 depýtat saılanady. Jalpy parlament 90 depýtattan turady.
Ortalyq saılaý komıssııasy merziminen buryn ótetin parlament saılaýyna qatysý úshin 461 úmitkerdi tirkedi.
Qatysýdan bas tartqandar jáne eskertý alǵandar
Saılaýǵa birneshe kún qalǵan kezde qatysýdan bas tartqandar da bar. 27 qarashadaǵy otyrysta Ortalyq saılaý komıssııasy Lıra Akýnova men Gúlnaz Halılovanyń tirkeýin joıdy. Olar № 22 jáne № 24 kópmandattyq okrýgter boıynsha úmitker retinde tirkelgen bolatyn. Olardan saılaýǵa qatysýdan bas tartqandyǵy týraly ótinish tústi, osyǵan sáıkes zań boıynsha olardyń tirkeýi joıyldy.
Zań boıynsha, úmitkerler týraly jalǵan aqparat taratqan nemese olardyń ar-namysyn taptaǵan tulǵalar qylmystyq nemese basqa jaýapkershilikke tartylýy múmkin.
Ortalyq saılaý komıssııasy úgit-nasıhat erejelerin buzý týraly máselelerdi qaraýdy jalǵastyryp jatyr. Jumys tobynyń usynystary negizinde keıbir úmitkerlerge eskertý berildi nemese ákimshilik aıyppuldar taǵaıyndaldy. Sondaı-aq, Ortalyq saılaý komıssııasy úmitkerlerden túsken shaǵymdardy qarastyra beredi, alaıda barlyq talaptar qanaǵattandyrylmaıdy.
Ortalyq saılaý komıssııasynyń málimeti boıynsha, saılaýshylar tizimine 4 294 243 azamat engizilgen:
-
Erler — 2 081 514 (48,47%);
-
Áıelder — 2 212 729 (51,52%).
Saılaýshylardyń jas quramy:
-
18 jas — 104 693 (2,44%);
-
19–35 jas — 1 707 851 (39,77%);
-
36–45 jas — 923 975 (21,52%);
-
46–55 jas — 650 851 (15,16%);
-
56–65 jas — 528 771 (12,31%);
-
66 jastan joǵary — 378 102 (8,80%).
Saılaý ýchaskeleri
30 qarashada saǵat 08:00–de el boıynsha 2492 saılaý ýchaskesi ashylady. Shetelde turatyn azamattardyń saılaý quqyǵyn qamtamasyz etý úshin 100 ýchaske uıymdastyryldy. Sonymen qatar, 27 qashyqtan daýys berý pýnkti jumys isteıdi — áýejaılarda (ushý jáne kelý aımaqtarynda), iri bazarlarda, saýda ortalyqtarynda, ýaqytsha ustaý ızolıatorlarynda, medıtsınalyq mekemelerde jáne basqa da kóp adam jınalatyn oryndarda.
Alǵash ret qashyqtan daýys berý formasy engizildi
Merziminen buryn ótetin parlament saılaýynda jańa júıe paıda boldy. Elde 30 kópmandattyq okrýg qurylyp, alǵash ret qashyqtan daýys berý júıesi engizildi. Jańa jabdyq saılaýshylardyń málimetterin bir mınýt ishinde óńdeı alady jáne 12 saǵat ishinde 800-ge deıin saılaýshyǵa qyzmet kórsetý múmkindigi bar. Bul sharalar saılaýshylarǵa yńǵaıly jaǵdaı jasaý jáne olardyń belsendiligin arttyrý maqsatynda qolǵa alyndy.
Baqylaýshylar
Ortalyq saılaý komıssııasy 788 halyqaralyq baqylaýshyny tirkedi. Olardyń arasynda TMD mıssııalarynyń, TMD Parlamentaralyq Assambleıasynyń, Túrki memleketteri uıymynyń, TıÝRKPA, ASEM, OBSE, PASE mıssııalarynyń ókilderi, sondaı-aq elshilikterdiń qyzmetkerleri bar.
Budan buryn Qyrǵyzstanda saılaýdan keıin jappaı tártipsizdik uıymdastyrmaq bolǵan 10 kúdikti ustalǵanyn jazǵan edik.