Búgin Qazaqstannyń basym bóliginde naızaǵaı oınap, jańbyr jaýady
ASTANA. KAZINFORM – «Qazgıdromet» RMK 13 qyrkúıekte Qazaqstan aýmaǵynda kútiletin qaýipti meteorologııalyq qubylystarǵa boljam jasady.
Atmosferalyq frontaldy bólimderdiń áserinen elimizdiń basym bóliginde naızaǵaı oınap, jańbyr jaýady.
Shyǵys óńirlerde qatty jaýyn kútiledi. Respýblıka boıynsha jel kúsheıip, soltústik-batys, soltústik, shyǵys jáne ortalyq aımaqtarda túngi jáne tańerteńgi ýaqytta tuman túsedi.
- Túnde Qostanaı, Aqmola jáne Soltústik Qazaqstan oblystarynyń batysy men soltústiginde 2 gradýsqa deıin úsik júredi. Sondaı-aq Qaraǵandy oblysynyń batysynda, soltústiginde jáne shyǵysynda topyraq betinde 2 gradýs úsik kútiledi, - delingen aqparatta.
Jetisý oblysynyń soltústigi men shyǵysynda, Almaty oblysynyń ońtústik-shyǵysynda, Aqmola oblysynyń soltústik-batysynda, Batys Qazaqstan oblysynyń shyǵysynda, Atyraý oblysynyń batysynda, Aqtóbe oblysynyń batysy men ortalyǵynda, Qaraǵandy oblysynyń ońtústiginde joǵary órt qaýpi saqtalady.
Al Almaty, Túrkistan, Qyzylorda, Atyraý, Jambyl, Jetisý oblystarynda, Ulytaý oblysynyń ońtústiginde, Mańǵystaý oblysynyń soltústik-batysy, ortalyǵy men ońtústiginde, Batys Qazaqstannyń batysy men ońtústiginde, Qostanaı oblysynyń ońtústik-batysynda, Qaraǵandy oblysynyń ońtústiginde, Aqtóbe oblysynyń shyǵysynda tótenshe órt qaýpi boljanyp otyr.