Búgin Qazaqstannyń 122 azamaty men olardyń otbasy músheleri Gaza sektorynan evakýatsııalanady
Búgin, 14 qarasha kúni qazaqstandyqtar men olardyń otbasy músheleri Gaza sektorynan Mysyr men Palestına anklavynyń shekarasyndaǵy Rafah baqylaý-ótkizý pýnkti arqyly evakýatsııalanady.
Kazinform agenttiginiń tilshisi bul týraly Gaza sektorynyń Shekara ótkelderi bas basqarmasyna silteme jasap habarlaıdy.
14 qarashaǵa qaraǵan túni Gaza sektorynan Mysyr baǵytynda Rafah baqylaý-ótkizý beketinen ótýge ruqsat etilgen sheteldik azamattardyń tizimi jarııalandy, olardyń arasynda «Qazaqstan» degen baǵanda Qazaqstan men Palestına azamattyǵyn alǵan 122 adam bar.
Atap ótilgendeı, tizimde kórsetilgen azamattar tıisti rásimderden ótýi úshin jergilikti ýaqyt boıynsha tańǵy saǵat 7:00-de (Astana ýaqytymen saǵat 10:00) «Rafah» baqylaý-ótkizý beketiniń syrtqy ótkel zalynda bolýy tıis.
Qazaqstan azamattarymen birge 14 qarashada Gaza sektorynan Soltústik Makedonııa, Fınlıandııa, Iordanııa, Ulybrıtanııa, Ispanııa, Rýmynııa, Germanııa, Reseı, Shvetsııa, AQSh jáne Danııa azamattary shyǵady. Sondaı-aq Palestına anklavynan jeke tizim usynǵan Mysyrdyń 159 azamaty shyǵa alady.
Qazirgi ýaqytta QR Syrtqy ister mınıstrligi men QR Mysyrdaǵy Elshiligi azamattarymyzdy evakýatsııalaýǵa kómek kórsetýdi uıymdastyrý boıynsha qajetti sharalar qabyldaýda.
Bir kún buryn Syrtqy ister mınıstrliginiń resmı ókili Aıbek Smadııarov 44 adamnan turatyn Qazaqstan azamattarynyń birinshi tobyn evakýatsııalaý josparlanyp otyrǵanyn, olar qurlyqpen Kaırge jetkiziletinin, qajetti qujattary tekserilgennen keıin Qazaqstanǵa jóneltiletinin habarlady.
10 qarashada QR Syrtqy ister mınıstri Murat Nurtileý men Izraıl Syrtqy ister mınıstrliginiń basshysy Elı Koen telefon arqyly sóılesti. Áńgimelesý barysynda M.Nurtileý ızraıldik áriptesine Gaza sektoryndaǵy Qazaqstan azamattaryn evakýatsııalaýǵa járdemdesýdi surady. Buǵan jaýap retinde E.Koen ızraıldik tarap QR azamattaryn evakýatsııalaý máselesin sheshýge bar kúsh-jigerin salatynyn jetkizdi.
Buǵan deıin QR Syrtqy ister mınıstrligi Gaza sektorynda 76 qazaqstandyq jáne otbasy múshelerimen birge olardyń sany 161 adam ekenin habarlaǵan.
10 qarashada Izraıl men palestınalyq HAMAS toby arasyndaǵy soǵys qımyldary bastalǵannan beri baqylaý-ótkizý pýnkti úshinshi ret jabylǵany habarlanǵan. Arabtildi BAQ 10-11 qarashada shekaradan ótý toqtaǵanyn jáne onyń Gaza sektorynan evakýatsııalanǵan naýqastardy tasymaldaýdaǵy qıyndyqtarǵa baılanysty bolǵanyn jazdy.
