Elimizde 9,5 myńnan astam kitaphanashy, 73 mıllıonǵa jýyq kitap bar
ASTANA. KAZINFORM – Mádenıet jáne aqparat mınıstrligi jyl saıyn 24 qazanda Qazaqstanda Kitaphanashylar kúni atalyp ótetinin habarlady.
«Kitaphana — bilim men mádenıet saqtalatyn oryn bolsa, sizderdiń eren eńbekterińiz Qazaqstan azamattaryna bilim men rýhanı qundylyqtarǵa qol jetkizýge kómektesedi», — dep jazdy vedomstvodan.
Elimizde 12 myńǵa jýyq kitaphana bar, olardyń 4 myńǵa jýyǵy Mádenıet jáne aqparat mınıstrliginiń qaramaǵynda. Atalǵan kitaphanalarda 9,5 myńnan astam kitaphanashy 73 mıllıonǵa jýyq kitapty saqtaýmen aınalysady. Sizder atqaryp otyrǵan eńbekterińizdiń arqasynda 2020-2024 jyldar aralyǵynda kópshilik kitaphana paıdalanýshylarynyń sany 3 mıllıonnan 5 mıllıonǵa ósti. Elektrondy kitaptar men qujattarǵa jyl saıyn álemniń 110 eliniń paıdalanýshylary júginedi.
«Mınıstrlik kitaphanalardy jańǵyrtý, olardy jabdyqtaý men qorlardy tolyqtyrý jumystaryn jalǵastyrýda. „Qazaqstandyq ulttyq elektrondyq kitaphana“ jobasy aıtarlyqtaı damyp keledi.
Sizderdiń eńbekterińiz ben mádenı murany saqtaý jolyndaǵy úlesterińizge shynaıy alǵysymyzdy bildiremiz. Barshańyzǵa zor densaýlyq pen tabys tileımiz», — delingen aqparatta.
