Búgin Qazaqstanda 145 myńnan astam meıirger kásibı merekesin atap ótip jatyr
ASTANA. KAZINFORM – Búgin, 12 mamyrda álemde Halyqaralyq meıirger kúni atalyp ótedi.
Qazaqstannyń densaýlyq saqtaý júıesinde patsıentterge kútim kórsetip, salanyń turaqty jumysyn qamtamasyz etip otyrǵan 145 myńnan astam maman bar.
Meıirgerler — medıtsına qyzmetkerleriniń eń kóp sanattaǵy toby. Olar patsıentti alǵashqy qabyldaýdan bastap emdeý men ońaltýǵa deıingi barlyq kezeńde súıemeldep, medıtsınalyq kómektiń sapasy men úzdiksizdigin qamtamasyz etedi.
Búginde eldiń densaýlyq saqtaý júıesinde orta býynnyń 188 myńnan astam medıtsına qyzmetkeri eńbek etedi, olardyń 145 myńnan astamy — meıirger.
50 myńnan astam maman aýyldyq jerlerde, al shamamen 65 myńy medıtsınalyq-sanıtarııalyq alǵashqy kómek kórsetý deńgeıinde jumys isteıdi. Qazaqstanda medıtsınalyq-sanıtarııalyq alǵashqy kómek deńgeıinde keńeıtilgen meıirgerlik tájirıbe belsendi damyp keledi. Meıirgerler sozylmaly aýrýlary bar patsıentterdi júrgizýge, profılaktıkaǵa, dınamıkalyq baqylaýǵa jáne konsýltatsııa berýge qatysyp, alǵashqy kómektiń qoljetimdiligi men tıimdiligin arttyrýǵa úles qosyp keledi.
Densaýlyq saqtaý mınıstrligi málimetinshe, kadr daıarlaýdy 94 medıtsınalyq kolledj júzege asyrady, onyń ishinde meıirger isi boıynsha qoldanbaly bakalavrıat baǵdarlamalaryn iske asyratyn 42 joǵary medıtsınalyq kolledj bar. Qazirgi tańda kolledjderde 109 myńnan astam stýdent bilim alyp jatyr.
Qazaqstanda — kishi meıirgerden bastap «bakalavrıat – magıstratýra – doktorantýra» baǵdarlamalaryna deıin meıirger isi mamandaryn daıarlaýdyń kópdeńgeıli júıesi qalyptasqan. Meıirgerlerdiń eńbegi medıtsınalyq kómektiń sapasyn arttyrý men halyq densaýlyǵyn saqtaýdyń negizgi faktorlarynyń biri bolyp qala beredi.
Buǵan deıin elimizde qansha patronajdyq meıirger qyzmet atqaratynyn jazǵan edik.
