Búgin Qazaqstan fýtzal quramasy Ázerbaıjanmen joldastyq kezdesý ótkizedi
ASTANA. KAZINFORM - Búgin fýtzaldan Qazaqstan ulttyq quramasy Aqtaý qalasynda Ázirbaıjanmen alǵashqy joldastyq kezdesýin ótkizedi.
Kezdesý Qazaqstan ýaqytymen 19:50-de bastalyp, «Qazsport» telearnasynan tikeleı efırde kórsetiledi.
FIFA kúntizbesine sáıkes otandastarymyz 5-15 sáýir aralyǵynda oqý-jattyǵý jıynyn ótkizedi. Kakaý bastaǵan otandastarymyz oqý-jattyǵý jıyny aıasynda Aqtaý qalasynda Ázerbaıjan quramasymen 13 jáne 15 sáýir kúnderi eki joldastyq match ótkizedi.
Qazaqstan quramasynyń tizimi
Qaqpashylar: Leo Igıta, Narýn Serikov («Aqtóbe»), Dáýlet Zatybekov («Tulpar»);
Alańdaǵy oıynshylar: Edson, Birjan Orazov (ekeýi – «Qaırat»), Arnold Knaýb, Ábdirasýl Ábdimanapuly, Erjan Karmenov (ekeýi – «Semeı»), Azat Valıýllın («Aıat»), Jahangır Rashıt («Atyraý»), Aqjol Dáribaı («Tulpar»), Nursultan Tańatuly, Damır Qaıyrbaı (ekeýi – «Kaspıı»), Albert Aqbalyqov («Aqtóbe»), Aqedil Madııarov («Baıterek»), Aleksandr Derıabın («Tıýmen», Reseı).
Eki qurama taǵy bir joldastyq kezdeýdi 15 sáýir kúni ótkizedi.
Qazaqstan chempıonatynyń 38-týryndaǵy «Aqtóbege» qarsy oıynda «Qaırattyń» oıynshysy Dáýren Tursaǵulov jaraqat aldy. Medıtsınalyq tekserý nátıjesinen keıin, Dáýrenniń aldaǵy oıyndarǵa qatysa almaıtyny anyqtaldy.
Ulttyq quramanyń jattyqtyrýshylar shtaby jaraqat alǵan shabýylshynyń ornyna «Kaspıı» klýbynyń oıynshysy Nursultan Tańatulyn shaqyrý týraly sheshim qabyldady.
Aıta ketsek, el quramasy 2026 jylǵy Eýropa chempıonatynda óz tobynda ekinshi oryndy mise tutty.
Aldymen Albanııany 2:0 esebimen jeńse, odan keıin Armenııamen 4:4 esebimen teń oınady. Úshinshi kezdesýinde Danııadan 2:3 esebimen jeńilip qalsa, óz alańynda atalǵan qarsylasyn 7:3 esebimen tize búktirgen edi. Besinshi oıynda Albanııadan 4:2 esebimen basym tússe, dál sondaı eseppen syrt alańda Armenııaǵa ese jiberdi.
Odan keıin pleı-off satysynda otandastarymyz Italııa quramasyna (2:1, 2:3, penaltıden 0:1) jol berdi.
