Búgin Qazaqstan azamattaryn Taıaý Shyǵys elderinen alyp kelý úshin birneshe reıs jasalady

ASTANA.KAZINFORM - 4 naýryzdan 5 naýryzǵa qaraǵan túni Qazaqstanǵa Air Astana jáne Flydubai áýe kompanııalary 5 reıs jasady. Osy reıstermen elge 851 jolaýshy jetkizildi.

Azamattyq avıatsııa komıteti málimetinshe, 5 naýryz kúni Qazaqstanǵa jolaýshylardy alyp kelý úshin qazaqstandyq jáne sheteldik áýe kompanııalar taǵy birneshe reıs oryndaıdy.

Air Astana áýe kompanııasy Jıdda – Aqtaý – Almaty jáne Jıdda – Atyraý – Almaty baǵyttary boıynsha eki reıs oryndaýdy josparlap otyr. SCAT Airlines áýe kompanııasymen Maskat – Almaty baǵyty boıynsha 2 reıs oryndalady.

Air Arabia áýe kompanııasy Shardja – Almaty baǵyty boıynsha reıs oryndap jatyr. Táýliktiń sońyna deıin osy baǵytta taǵy bir reıs josparlanǵan. Flydubai áýe kompanııasy Dýbaı qalasynan Almaty jáne Astana qalalaryna reıster jasaýdy josparlap otyr (jolaýshylar sany naqtylanyp jatyr).

3 naýryzdan bastap Taıaý Shyǵys elderinen Qazaqstan Respýblıkasyna barlyǵy 12 reıs ushyp keldi. Nátıjesinde 2111 jolaýshy elge oraldy.

Búginge josparlanǵan reısterdi eskere otyryp, Taıaý Shyǵys elderinen Qazaqstanǵa shamamen 4000 azamat jetkiziledi.

Qazaqstan azamattaryn elge qaıtarý jumystary ýákiletti memlekettik organdar men áýe kompanııalarynyń birlesken jumysy aıasynda jalǵasyp jatyr.

Aıta keteıik, búgin tańǵy saǵat 05:00 shamasynda Atyraý qalasyna Saýd Arabııasynyń Jıdda qalasynan 180 jolaýshy mingen ushaq qondy. Keıin olar Almaty qalasyna ushyp ketti.

Elge oralǵan azamattardyń aıtýynsha, olar Dohadan Er-Rııad qalasyna deıin avtobýspen shamamen 13 saǵat, keıin Er-Rııadtan Jıddaǵa 10 saǵattan astam ýaqyt júrip, jetken. Jol boıynda qaýipsizdik máselesi únemi baqylaýda bolyp, jolaýshylardy Qazaqstannyń sheteldegi dıplomatııalyq ókildikteri súıemeldegen.