Búgin qaı óńirlerdiń aýasy lastanady
ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady.
— 28 qyrkúıekte Almaty jáne Oral qalalarynda, túnde Óskemen, Aqtóbe, Atyraý, Petropavl, Qostanaı jáne Astana qalalarynda qolaısyz meteorologııalyq jaǵdaılar kútiledi, — delingen habarlamada.
Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
Aıta keteıik, Jańaózendegi «Qazaq gaz óńdeý zaýyty» JShS-ne ekologııalyq talaptardy buzǵany úshin 2 mln 378 myń 750 teńge kóleminde aıyppul salyndy.
Al Shyǵys Qazaqstan oblysy Katonqaraǵaı aýdanynda jergilikti atqarýshy organdarǵa jospardan tys ekologııalyq tekserý júrgizildi.
Buǵan deıin Aqtóbede aýadaǵy zııandy zattardyń mólsheri shekti deńgeıden asty.
