Búgin qaı qalalarda aýa sapasy nasharlaıdy
ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady.
- 17 qazanda Aqtóbe, Almaty qalalarynda, túnde Qostanaı, Qaraǵandy, Temirtaý, Astana qalalarynda qolaısyz meteorologııalyq jaǵdaı kútiledi, - delingen habarlamada.
Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
Aıta keteıik, 17 qazanda Qazaqstannyń birqatar óńirinde aýa raıyna baılanysty eskertý jarııalandy. Sınoptıkter jańbyrdyń qarǵa ulasýyn, tuman, kóktaıǵaq, shańdy daýyl bolyp, jeldiń kúsheıýin boljady.
