Búgin qaı qalalarda aýa sapasy nasharlaıdy
ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady.
— 11 qarashada Qostanaı, Pavlodar, Qaraǵandy, Temirtaý, Atyraý, Astana qalalarynda lastaýshy zattardyń jınalýyna yqpal etetin meteorologııalyq jaǵdaılar kútiledi, — delingen habarlamada.
Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
Aıta keteıik, Qaraǵandy oblysynda ekologııalyq ahýal kúrdeli. Aımaqta aýaǵa 293,7 myń tonna zııandy zat taraǵan.
Al Soltústik Qazaqstan oblysynda ekologııalyq talaptardy oryndamaǵan 16 sýbekt ákimshilik jaýapkershilikke tartyldy.
Sondaı-aq Ekibastuzda ekologııalyq talaptardy buzǵan kásiporyn 70 mln teńgege jýyq aıyppul tóledi.
