Búgin Qarýly kúshterde ınjenerlik-avıatsııalyq qamtamasyz etý mamany kúni atalyp ótedi
ASTANA. KAZINFORM — 21 mamyr — Áýe qorǵanysy kúshterin ınjenerlik-avıatsııalyq qamtamasyz etý mamandarynyń kásibı merekesi. Tehnıkanyń jaramdylyǵy men eldiń áýe shebin qorǵaý jónindegi mindetterdi oryndaýǵa daıyndyǵy osy sala mamandarynyń qolynda. Bul týraly Qorǵanys mınıstrligi málim etti.
— Qazaqstan Qarýly kúshterin ınjenerlik-avıatsııalyq qamtamasyz etý júıesiniń qalyptasýy 1993 jyly bastaldy. Kúrdeli jaǵdaılar men resýrstardyń tapshylyǵyna qaramastan, ınjenerlik-tehnıkalyq quram avıatsııanyń jaýyngerlik qabiletin saqtap, ony odan ári damytýdyń negizi boldy, — delingen habarlamada.
Vedomstvonyń málimetinshe, búgingi tańda bul qyzmettiń mamandary ushaqtar men tikushaqtardy senimdi paıdalanýdy qamtamasyz etedi. Dıagnostıka júrgizip, jabdyqty baptaıdy jáne áýe kemelerin ushýǵa daıyndaıdy. Ár ushýdyń artynda ınjenerlerdiń, tehnıkter men mehanıkterdiń kásibı, úılesimdi jáne jaýapty jumysy tur.
Áskerı avıatsııa mamandary táýlik boıy eldiń áýe keńistigin kúzetý boıynsha ushýlardyń oryndalýyn jáne jaýyngerlik kezekshiliktiń ótýin qamtamasyz etedi. Budan basqa, olar avıatsııalyq parkti jańǵyrtýǵa, zamanaýı tehnologııalardy engizýge jáne jas kadrlardy oqytýǵa atsalysady.
— Osy beıindegi mamandardy daıarlaý Talǵat Bıgeldınov atyndaǵy Áýe qorǵanysy kúshteriniń áskerı ınstıtýtynda, QR Ulttyq qorǵanys ýnıversıtetinde jáne sheteldik áskerı oqý oryndarynda júzege asyrylady, — dep habarlady mınıstrlikten.
Bıyl zamanaýı qazaq áskeriniń ınjenerlik-avıatsııalyq qamtamasyz etý bólimsheleri qurylǵanyna 33 jyl tolýyn atap ótýde. Olardyń kúndelikti eńbegi, joǵary kásibıligi men iske degen adaldyǵy avıatsııanyń jaýyngerlik ázirligin nyǵaıtyp, áýe keńistiginiń qaýipsizdigi men el aspanynyń tynyshtyǵyn qamtamasyz etetin senimdi tirek bolyp tabylady.
Elimizdiń qaýipsizdigi men tynyshtyǵyn qamtamasyz etýde Áýe qorǵanysy kúshteriniń orny erek. Búginde Qazaqstannyń áskerı avıatsııasy quramynda ártúrli áýe kólikteri bar. Tolyǵyraq myna siltemeden oqyńyz.
