Búgin hırýrg dárigerler kásibı merekesin atap ótti

ASTANA. KAZINFORM – Jyl saıyn qyrkúıektiń úshinshi senbisinde halyqaralyq hırýrg kúni – medıtsınadaǵy eń qıyn baǵyttaǵy dárigerlerdiń kásibı merekesi atap ótiledi. Bul týraly QR Densaýlyq saqtaý mınıstrliginiń baspasóz qyzmeti málim etti. 

Elimizdiń densaýlyq saqtaý júıesinde 2 myńǵa jýyq hırýrg jumys isteıdi, jylyna elimizdiń medıtsınalyq joǵary oqý oryndary mamandardyń qataryna qosylýǵa daıyn 100-den astam jas mamandy daıarlap shyǵarady.

«Sizderdiń mamandyqtaryńyz tek joǵary biliktilikti ǵana emes, sonymen qatar asqan batyldyqty, tózimdilikti jáne adaldyqty qajet etedi. Kún saıyn sizder adamdardyń ómirine baılanysty kúrdeli sheshimder qabyldaısyzdar. Jyl saıyn 160 myńǵa jýyq josparly jáne shuǵyl operatsııalar júrgiziledi. Densaýlyq saqtaý mınıstrligi medıtsına salasyn damytýǵa qosqan úlesterińizdi joǵary baǵalaıdy», - dedi Densaýlyq saqtaý mınıstri Aqmaral Álnazarova qazaqstandyq hırýrgtarǵa.

Halyqty qoljetimdi jáne sapaly hırýrgııalyq kómekpen qamtamasyz etý úshin Densaýlyq saqtaý mınıstrligi standarttardy, jalpy normatıvtik bazany jaqsartady, progressıvti medıtsınalyq tehnologııalardy engizýge, aýrýhanalardy jańa jabdyqtarmen qamtamasyz etýge jaǵdaı jasaıdy.

Qazaqstan hırýrgııasynda az ınvazıvti aralasýlar, robottandyrylǵan júıeler jáne endoskopııalyq tehnıka belsendi engizilýde. Operatsııalyq bloktar operatsııalardy eń az jaraqattaýmen jáne joǵary dáldik deńgeıimen júrgizýge múmkindik beretin joǵary tehnologııalyq qurylǵylarmen jabdyqtalǵan.

Búginde Qazaqstan «ashyq júrekke»kúrdeli operatsııa jasaýǵa qabiletti álemniń 22 eliniń qataryna kiredi.

Qazaqstan Respýblıkasy Densaýlyq saqtaý mınıstrligi barlyq hırýrgtardy kásibı merekelerimen quttyqtaıdy jáne qajyrly eńbegi, biliktiligi men ult densaýlyǵyn nyǵaıtýǵa qosqan baǵa jetpes úlesi úshin shyn júrekten alǵys bildiredi.