Búgin — halyqaralyq taekvondo kúni
ASTANA. KAZINFORM — Búgin — halyqaralyq taekvondo kúni. 1994 jyldyń 4 qyrkúıeginde taekvondo Halyqaralyq Olımpıada komıtetiniń sheshimimen olımpııa oıyndarynyń baǵdarlamasyna qosylǵan. Osyǵan oraı 2006 jyldan beri Halyqaralyq taekvondo federatsııasy bul kúndi ataýly dataǵa aınaldyrǵan.
Qazir bul sport túrimen 200-den astam elde 80 mıllıonnan asa adam aınalysady. Onyń ishinde qazaqstandyq sportshylar da halyqaralyq jarystarda bıik jetistikterge jetip júr. Otandastarymyzdyń bul sport túrindegi qarqyny týraly «Jibek joly» telearnasyndaǵy «Búgin LIVE» baǵdarlamasynda Qazaqstan taekvondo federatsııasynyń bas hatshysy Aral Sadyqov aıtty.
Eldegi taekvondo sportynyń damý qarqyny jaqsy. Biraq, áli de nazar aýdarýdy qajet etetin tustary barshylyq.
— 2024 jyly Qazaqstan teekvondo federatsııasynyń Prezıdenti taǵaıyndaldy. Qazir sol kisiniń tapsyrmasyna saı birshama jumystar júıelenip qaldy. Infraqurylym jaǵynan túıtkildi túıinder kóp. Oǵan baılanysty birneshe joba qolǵa alyndy. Eldegi respýblıkalyq týrnırlerdiń aýqymy keńeıip, abyroıy artyp keledi. Qazir federatsııa tarapynan eloktordy júıege kóship jatyrmyz. Joǵaryda aıtqan jarystar osy júıe boıynsha uıymdastyrylady. Buǵan qosa bizdiń tóreshiler halyqaralyq tájirıbeni jetik meńgergen, — deıdi Aral Sadyqov.
Qazaqstanda qazir atalmysh sport túrimen 30 myńǵa jýyq sportshy aınalysady. Taekvondoǵa qyzyǵýshylar sanyn arttyrý úshin ilkimdi ister qolǵa alynyp jatyr.
— Biz 2016 jyly King club Astana atty klýbty ashtyq. Sonyń ishinde Qazaqstan chempıondaryn daıarlap shyǵardyq. Álem chempıonatynyń kúmis júldegeri shyqty. Jáne barsha halyqaralyq týrnırlerdiń chempıondaryn shyǵardyq. Soǵan baılanysty bizde sala hatshylaryna arnalǵan arnaıy talaptar bar. Federatsııa hatshylary sol salanyń mamany bolýy kerek degen ustanym bar. Sebebi, bul sport túrin túsinbeıtin adam onyń ári qaraı damýyna úles qosa almaıdy, - dedi ol óz sózinde.
Jalpy, taekvondo 2000 jyly alǵash ret Sıdneıde Olımpıada baǵdarlamasyna kirgen. Oǵan deıin Seýl men Barselonadaǵy oıyn kezinde arnaıy kórsetilim retinde ótkenin de tilge tıek etti.
Eske sala keteıik, taekvondodan Mýdjý qalasynda (Ońtústik Koreıa) ótip jatqan Gran-prı kezeńinde Qazaqstan quramasy ekinshi medalin jeńip aldy.