Búgin fýtzaldan Qazaqstan quramasy Belarýspen qarymta oıyn ótkizedi
ASTANA. KAZINFORM — Fýtzaldan Qazaqstan quramasy 2028 jylǵy álem chempıonaty negizgi irikteý kezeńinde syrt alańda Belarýspen qarymta kezdesý ótkizedi.
Bul oıyn qarashanyń 10-nan 11-ne qaraǵan túni Qazaqstan ýaqytymen 00:00–de bastalyp, «Qazsport» telearnasynan tikeleı efırde kórsetiledi.
Eki qurama arasynda elordada ótken alǵashqy matchta otandastarymyz 5:4 esebimen basym túsken edi.
Qazaqstan quramasy budan keıin 9 jeltoqsan men 2027 jyldyń 2 naýryzynda Albanııamen eki oıyn ótkizedi.
Qazaqstan quramasynyń tizimi
Qaqpashylar: Igıta, Talgat Ótepbergenov, Narýn Serikov.
Alańdaǵy oıynshylar: Birjan Orazov, Jahangır Rashıt, Arnold Knaýb, Nursultan Pııaly, Dýglas, Edson, Erjan Karmenov, Nurqanat Baktııarov, Aleksandr Derıabın, Rınat Tóreǵazın, Albert Akbalyqov, Azat Valıýllın, Dáýren Tursaǵulov.
Aıta keteıik, irikteýdiń negizgi kezeńinde 36 ulttyq qurama baq synaıdy. Olar úsh quramadan 12 topqa bólindi. Matchtar úıde jáne syrt alańda ótedi.
Negizgi raýnd matchtary 2026 jylǵy 12-21 qazan, 2-11 qarasha, 6-9 jeltoqsan aralyǵynda jáne 2027 jylǵy 22 aqpan men 3 naýryz aralyǵynda bolady.
Negizgi kezeńniń qorytyndysy boıynsha barlyq 12 toptyń jeńimpazy men ekinshi oryn alǵan úzdik tórt qurama elıtalyq raýndqa tikeleı joldama alady. Al ekinshi oryn ıelengen qalǵan segiz komanda pleı-off kezeńinde álem chempıonatynyń kelesi satysyna shyǵý úshin kúresin jalǵastyrady.
Qazirge deıin fýtzaldan Qazaqstan quramasy álem chempıonaty fınaldyq kezeńine tórt márte qatysty. Ázirshe eń joǵary jetistigi — 2021 jylǵy tórtinshi oryn.