Búgin fýtboldan Ulttar lıgasynda jartylaı fınal oıyndary bastalady

ASTANA. KAZINFORM — Búgin fýtboldan UEFA Ulttar lıgasy A dıvızıondaǵy jartylaı fınal oıyndary bastalady.

Fınaldyq kezeń Germanııanyń Mıýnhen jáne Shtýtgart qalalarynda bolady. Jartylaı fınaldyń biri men fınal «Arena Mıýnhen» stadıonynda ótkizilse, «Shtýtgart Arenada» jartylaı fınaldyń taǵy bir kezdesýi men úshinshi oryn úshin match uıymdastyrylady.

Jarystyń atalǵan satysyndaǵy alǵashqy kezdesý qazaqstandyq ýaqytpen 23:50–de búgin Germanııa men Portýgalııa quramalary arasynda ótip, «Qazsport» telearnasynan tikeleı efırde kórsetiledi.

Ulttar lıgasynda Germanııa quramasy úshinshi topta Nıderland, Majarstan, Bosnııa jáne Gertsogovınany artta qaldyryp, óz tobynda 14 upaımen birinshi oryn aldy. 

Al Portýgalııa birinshi topta Horvatııa, Shotlandııa, Polshany jeńip, 14 upaımen kósh basyna shyqty.

Eki qurama qazirge deıin 11 márte kezdesti. Onyń 7-eýi germanııanyń basymdyǵymen aıaqtalsa, úsheýinde teń nátıje tirkelip, qalǵanynda Portýgalııanyń mereıi ústem boldy. 

Sondaı-aq erteń, 5 maýsymda jarystyń atalǵan satysynda Ispanııa men Frantsııa sheberlik baıqasady. 

Odan keıin 3-oryn úshin saıys jáne fınal 8 maýsymǵa belgilengen.

Ulttar lıgasy 2018 jyldan beri turaqty túrde ótkizilip keledi. Qazirge deıin Portýgalııa, Frantsııa, Ispanııa quramalary chempıon atandy.

Aıta ketsek, Qazaqstan quramasy 2024 jyly Ulttar lıgasynda V dıvızıonynda úshinshi topta Norvegııa, Slovenııa, Aýstrııamen baq synap, tórtinshi oryndy mise tutty. Saldarynan qaıtadan S dıvızıonyna túsip qaldy.