Búgin fýtboldan Lıga kýbogynda fınalǵa shyqqan komandalar anyqtalady

ASTANA. KAZINFORM - Búgin, 25 qyrkúıekte fýtboldan Lıga kýbogynyń jartylaı fınaldyq oıyndary ótedi. 

Jarystyń atalǵan satysynda «Astana» men «Elimaı» (Semeı), «Qaırat» (Almaty) pen «Jeńis» (Astana) komandalary qarymta kezdesý ótkizedi. Eki match ta elorda ýaqytymen 19:00-de bastalady.

Alǵashqy oıynda «Jeńis» komandasy «Qaıratty» 2:0 esebimen jeńse, «Astana» men «Elimaı» 0:0 esebimen teń tústi.

Fınal 24 qarashaǵa josparlanǵan. 

Lıga kýbogy oıyndary bıyl elimizde alǵash ret bastaldy. Bas júldege qol jetkizgen komanda qomaqty aqshalaı syıaqy alady. 

Aıta ketsek, budan buryn Premer-lıgada «Astana» tórtinshi oıyn qatarynan jeńiske jetken bolatyn. Elordalyq klýb Shymkentte jergilikti «Ordabasymen» kezdesti. «Astana» basty qarsylasyn 4:2 esebimen súrindirip, týrnır kestesinde úzdik úshtiktegi komandalarǵa jaqyndaı tústi.