Búgin fýtboldan Lıga kýbogy týrnıriniń ekinshi týry bastalady

ASTANA. KAZINFORM - Búgin fýtboldan Lıga kýbogy týrnıriniń ekinshi týry bastalady. Bıyl alǵash ret jalaýyn kótergen týrnırde 16 komanda 4 topta synǵa túsip, árqaısysy 3 oıynnan ótkizip jatyr. 

Búgin, 5 shildede S tobynda saǵat 20:00-de «Turan» (Túrkistan) men «Atyraý» komandalary jasyl alańǵa shyǵady. Bul toptaǵy «Ordabasy» (Shymkent) men «Elimaı» (Semeı) kezdesýi 6 shildede saǵat 20:00-ge josparlanǵan.  

6 shildede V tobynda 18:00-de «Tobyl» (Qostanaı) men «Aqtóbe», 20.00-de «Qaısar» (Qyzylorda) men «Jeńis» (Astana) sheberlik baıqasady. Sondaı-aq 7 shildede A tobynda 17:00-de «Aqjaıyq» pen «Taraz», «Qyzyljar» (Petropavl) men «Qaırat» (Almaty) kezdesedi.

Dál sol kúni D tobynda 20:00-de «Shahter» (Qaraǵandy) men «Jetisý» (Taldyqorǵan), «Astana» men «Kaspıı» (Aqtaý) synǵa túsedi.

Aıta ketsek, jartylaı fınalda 10-11 tamyz ben 30 qazanda A men V, S men D toptarynyń jeńimpazdary oınaıdy. Fınal 24 qarashaǵa josparlanǵan.

Eske salsaq, budan buryn Lıga kýbogynyń birinshi týr oıyndary ótkizildi.