Búgin fýtboldan Qazaqstan quramasy Belarýspen joldastyq kezdesý ótkizedi
ASTANA. KAZINFORM — Búgin fýtboldan Qazaqstan ulttyq quramasy Belarýske qarsy joldastyq kezdesý ótkizedi.
Oıyn Borısov qalasyndaǵy «Borısov-arena» stadıonynda qazaqstandyq ýaqytpen 21.50-de bastalyp, «Qazsport» telearnasynan tikeleı efırde kórsetiledi.
Alǵan jaraqatyna jáne densaýlyǵyna, otbasy jaǵdaıyna baılanysty Serikjan Mýjıkov, Álibek Qasym, Baktıer Zaınýtdınov, Aıbar Jaqsylyqov, Roman Asranqulov ulttyq quramaǵa búgin kómektese almaıdy.
Al Dastan Sátpaev aldymen ulttyq quramanyń oqý-jattyǵý jıynyna qatysty. Odan keıin Qazaqstan 21 jasqa deıingi jastar quramasyna qosylyp, 2027 jylǵy Eýropa chempıonatynyń irikteý kezeńi aıasynda Andorraǵa qarsy matchqa daıyndalady.
Qazirge deıin quramalar ózara jeti oıyn ótkizgen. Onyń tórteýinde Belarýs quramasy jeńse, taǵy eki match teń eseppen aıaqtalyp, bireýinde qazaqstandyq fýtbolshylar basym tústi.
2022 jylǵy ÝEFA Ulttar lıgasynyń S dıvızıonynda Qazaqstan quramasy bir kezdesýde 1:1 esebimen teń tússe, taǵy birinde 2:1 esebimen tize búktirdi.
2026 jylǵy álem chempıonatynda J tobynda Ýelske (1:3) jol berip, Lıýksembýrgti (2:0) qapy qaldyrdy.
Týrnır kestesinde úsh upaımen úshinshi orynda keledi.
Endi 10 maýsymda óz alańynda Soltústik Makedonııany qabyldaıdy.
Oıynshylar tizimi tómendegishe:
Qaqpashylar: Muhammedjan Seısen («Astana»), Aleksandr Zarýtskıı («Qaırat»), Stas Pokatılov («Sabah», Ázerbaıjan), Bekhan Shaızada («Ordabasy»);
Qorǵaýshylar: ıAn Vorogovskıı, Marat Bystrov (ekeýi de — «Astana»), Nuraly Álip («Zenıt», Reseı), Aleksandr Zýev, Naýryzbek Jagorov (bári — «Tobyl»), Erkin Tapalov («Qaırat»), Sergeı Malyı, Sultanbek Astanov (ekeýi de — «Ordabasy»), Ádilbek Jumahanov («Elimaı»);
Jartylaı qorǵaýshylar: Ashat Taǵybergen, Islam Chesnokov (ekeýi de — «Tobyl»), Almas Tólibaı («Elimaı»), Ǵalymjan Kenjebek («Koshıtse», Slovakııa), Dáýren Jumat («Oqjetpes»), Islambek Qýat («Jeńis»), Georgıı Jýkov («Pýşa», Polsha), Mýrodjon Halmatov («Ordabasy»);
Shabýylshylar: Maksım Samorodov («Ahmat», Reseı), Dastan Sátpaev («Qaırat»), Alııar Muhamed («Oqjetpes»).