Búgin fýtboldan Qazaqstan kýbogy jartylaı fınal oıyndary ótedi

ASTANA. KAZINFORM - Búgin, 25 maýsymda fýtboldan Qazaqstan kýbogy jartylaı fınalynyń alǵashqy oıyndary ótedi.

Jarystyń atalǵan satysynda saǵat 18:00-de «Qyzyljar» (Petropavl) men «Ordabasy» (Shymkent), 20:00-de «Tobyl» (Qostanaı) men «Jeńis» (Astana) oınaıdy.

Qarymta kezdesý 30 tamyzǵa belgilengen. 

Shırek fınalda «Ordabasy» almatylyq «Qaırattan» 1:0 esebimen basym tússe, «Qyzyljar» semeılik «Elimaıdy» penaltı serııasynda qapy qaldyrdy.

Al elordalyq «Jeńis» jáne «Astana» kezdesýiniń negizgi kezeńinde 1:1 esebimen teń tústi. Penaltı serııasynda «Jeńis» jartylaı fınalǵa joldama aldy.

Qostanaılyq «Tobyl» syrt alańda túrkistandyq «Turandy» 2:0 esebimen tize búktirdi. 

Bıyl Qazaqstan kýbogyna Premer-lıga, birinshi jáne ekinshi lıgadan barlyǵy 30 komanda qatysty. Aldymen birinshi jáne ekinshi lıga komandalary alǵashqy irikteý kezeńin ótkizdi.
Olardyń arasynan irkilmeı shyqqan eki klýb 1/8 fınalda Premer-lıga komandalary qataryna qosyldy.

Jeńimpaz 2026 jyly Konferentsııa lıgasynyń ekinshi irikteý kezeńine joldama alady.