Búgin fýtboldan 2026 jylǵy álem chempıonaty ótpeli kezeń oıyndary bastalady

Bul kezeńde Eýropa qurlyǵy boıynsha irikteý kezeńinde ekinshi oryn alǵan quramalar arasynda úzdik kórsetkishke qol jetkizgen Slovakııa, Kosovo, Danııa, Ýkraına, Túrkııa, Irlandııa, Polsha, Bosnııa jáne Gertsogovına, Italııa, Ýels, Albanııa, Chehııa álem chempıonatyna joldamany sarapqa salýǵa múmkindik aldy.

Sondaı-aq olardyń qataryna Ulttar lıgasynda joǵary orynnan kóringen Soltústik Makedonııa, Rýmynııa, Shvetsııa, Soltústik Irlandııa qosyldy. 

Barlyǵy on alty qurama tórt topqa bólindi. Olar aldymen jartylaı fınal oıyndaryn ótkizse, odan keıin jeńimpazdar fınalda baq synaýǵa múmkindik alady. 

A joly boıynsha Ýels - Bosnııa jáne Gertsogovına, Italııa men Soltústik Irlandııa, V jolymen Ýkraına men Shvetsııa, Polsha men Albanııa, S jolymen Slovakııa men Kosovo, Túrkııa men Rýmynııa, D jolymen Danııa men Soltústik Makedonııa, Chehııa men Irlandııa kezdesedi. 
Atalǵan oıyndardyń arasynan búgin, 26 naýryzda Qazaqstan ýaqytymen 21:50-de Túrkııa-Rýmynııa, 00:35-te Ýkraına - Shvetsııa kezdesýleri «Qazsport», Italııa -Soltústik Irlandııa oıyny «Qazaqstan» telearnasynan tikeleı efırde kórsetiledi.

Aıta ketsek, «Qazsport» telearnasyndaǵy Ýkraına - Shvetsııa arasyndaǵy match barysynda ózge kezdesýlerde soǵylǵan barlyq gol live-haılaıt formatynda jedel kórsetiledi.

Ózge kezdesýler:

Ýels - Bosnııa jáne Gertsegovına 

Polsha - Albanııa 

Slovakııa - Kosovo 

Danııa - Soltústik Makedonııa 

Chehııa - Irlandııa.

Jartylaı fınal 26 naýryzda bolsa, fınal 31 naýryzǵa belgilengen.

Al qurlyqaralyq ótpeli oıyndarda birinshi topta aldymen 26 naýryzda Jańa Kaledonııa men ıAmaıka synǵa túsip, jeńimpazy 31 naýryzda fınalda Kongo Demokratııalyq Respýblıkasymen joldamaǵa talasady.

Taǵy bir topta 26 naýryzda Bolıvııa men Sýrınam oınap, jeńimpaz qurama 31 naýryzda fınalda Irakpen kezdesedi. 

Alǵash ret dúbirli dodada 48 qurama baq synaıdy. Qazir oǵan 42 qurama joldama alyp úlgerdi. 
Álem chempıonatynyń fınaldyq kezeńi 2026 jyldyń 11 maýsymy men 19 shildesi aralyǵynda AQSh-tyń Atlanta, Boston, Dallas, Hıýston, Kanzas-Sıtı, Los-Andjeles, Maıamı, Nıý-Iork, Fıladelfııa, San-Frantsısko, Sıetl, Kanadannyń Toronto, Vankýver jáne Meksıkanyń Gvadalahara, Mehıko, Monterreı qalalarynda ótedi.

Aıta ketsek, Qazaqstan quramasy álem chempıonaty irikteý kezeńinde. Qazirge deıin otandastarymyz Ýelsten eki márte (1:3, 0:1), Soltústik Makedonııadan (0:1), Belgııadan (0:6) esebimen jeńilip, Soltústik Makedonııa jáne Belgııamen (1:1) teń tússe, Lıhtenshteındi (4:0, 2:0) eki márte tize búktirdi.

Buǵan deıin fýtboldan 2026 jylǵy álem chempıonatynyń jerebesi tartylǵanyn jazǵan edik.