Búgin Eskendir Hasanǵalıevke 85 jyl
ALMATY. KAZINFORM – 13 aqpan – QR Memlekettik syılyǵynyń ıegeri, Qazaqstannyń halyq ártisi Eskendir Hasanǵalıevtiń týǵan kúni. Tiri bolǵanda qazaq mýzyka óneriniń maıtalmany 85 jasqa tolar edi.
Eskendir Ótegenuly Hasanǵalıev 1940 jyly 13 aqpanda Batys Qazaqstan oblysynda týǵan.
1959 jyly Qurmanǵazy atyndaǵy Almaty memlekettik konservatorııasynyń vokaldy-hor fakýltetin, 1978 jyly Ál-Farabı atyndaǵy Shymkent mádenıet ınstıtýtyn bitirdi.
Ómirin ónerge arnaǵan Hasanǵalıevtiń «Atameken», «Ádemi», «Asyl arman», «Ómirimniń jazy», «Eskirmegen mahabbat» ánderin bilmeıtin qazaq joq.
Qazaqtyń án ónerine zor úles qosqan sazgerdiń repertýaryndaǵy avtorlyq týyndylary el júreginen oıyp turyp oryn alǵan. Shyǵarmashylyq ǵumyrynda orys, tatar, nemis aqyndarynyń óleńderine de án jazǵan. 200-ge jýyq án, romans jáne horǵa arnalǵan shyǵarmalardyń avtory.
Marapattary: Qazaqstannyń halyq ártisi, QR Memlekettik syılyǵynyń, «Qurmet», «Otan» ordenderiniń ıegeri. «Platındy Tarlan» syılyǵynyń laýreaty, «QR Táýelsizdigine 20 jyl medali», «QR Táýelsizdigine 25 jyl» medaliniń ıegeri, Oral pedagogıka ınıstıtýty men Shákárim atyndaǵy Semeı memlekettik ýnıversıtetiniń qurmetti professory, Batys Qazaqstan oblysynyń qurmetti azamaty.
Kompozıtor 2021 jyly 30 sáýirde koronavırýstan qaıtys boldy.
Almaty mýzeıinde Eskendir Hasanǵalıevtiń 85 jyldyǵyna arnalǵan «Atameken» – el rýhy» atty kórme ashyldy. Onda kompozıtordyń jeke zattary men fotosýretteri, marapattary, sahnalyq kostıýmderi, partıtýralary, mýzykalyq aspaptary, afıshalar jáne otbasylyq zattary tur.