Búgin «Ertis ormanynda» órt shyqty
ASTANA. KAZINFORM — 21 tamyzda respýblıka boıynsha «Ertis ormanynda» 1 orman órti tirkeldi. Bul týraly Ekologııa jáne tabıǵı resýrstar mınıstrligi málim etti.
Vedomstvonyń dereginshe, ormandy aýmaqtardaǵy órt oshaqtary áýe jáne jerústi monıtorıngi nátıjesinde jedel túrde tirkelgen. Jaǵdaı anyqtalǵan sátten bastap órtti aýyzdyqtaý úshin qajetti kúshter men tehnıkalar jumyldyryldy.
Oqıǵa oryndarynda orman sharýashylyǵynyń qyzmetkerleri, RMQK «Qazavıaormanqorǵaý» mamandary jáne órt sóndirý tehnıkasy jumys júrgizip jatyr.
— Qazirgi ýaqytta negizgi nazar órttiń ulǵaıýyna jáne jaqyn ornalasqan aýmaqtarǵa taralýyna jol bermeýge baǵyttalǵan. Mamandar órt oshaqtaryn oqshaýlaý, sóndirý jáne keıingi baqylaý jumystaryn jalǵastyryp jatyr, — delingen habarlamada.
Azamattardy órt qaýpi kúsheıgen kezeńde tabıǵı aýmaqtarda barynsha saq bolýǵa shaqyramyz. Ormanǵa barǵan kezde órt qaýipsizdigi talaptaryn qatań saqtap, otty qaraýsyz qaldyrmaý, janǵysh materıaldardy abaılap paıdalaný jáne tabıǵatqa qaýip tóndiretin áreketterge jol bermeý qajet.
Aıta keteıik, 20 tamyzda respýblıka boıynsha 3 orman órti tirkeldi.
