Búgin eń iri úsh qala men Temirtaýda aýa sapasy nasharlaıdy
«Qazgıdromet» RMK 26 qarashada Qazaqstan qalalarynda qalyptasatyn meteorologııalyq ahýalǵa boljamyn jarııalady, dep habarlaıdy Kazinform.
Jeksenbi kúni aýanyń lastanýynyń qolaısyz meteojaǵdaıy Almaty, Astana, Qaraǵandy jáne Temirtaý qalalarynda kútiledi. Ózge shaharlarda aýa sapasy norma sheginde bolady.
Qolaısyz meteorologııalyq jaǵdaılar – atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
