Búgin elordalyqtar áz Naýryzdy keń aýqymda merekeledi
ASTANA. KAZINFORM — Elordada Naýryz meıramyna arnalǵan aýqymdy is-sharalar qalanyń barlyq negizgi alańdarynda jalǵasyp jatyr. Atap aıtqanda, qala ákimdigi aldyndaǵy alańda, «Qazaq eli» monýmenti mańynda, «Astana Arena» stadıonynyń avtoturaǵynda, «Atatúrik» parkinde, Astana Music Hall avtoturaǵynda jáne EXPO aýmaǵynda merekelik is-sharalar ótip jaty. Bul týraly Astana qalasynyń áikmidigi málim etti.
Negizgi alańdarda ulttyq taǵamdar men qolóner buıymdary usynylatyn fýd-korttar men jármeńkeler jumys isteıdi, sheberlik saǵattary uıymdastyrylyp, ulttyq salt-dástúrler kórsetilýde. Sport áýesqoılary úshin qazaqsha kúres, sadaq atý, gir sporty, qol kúresi, asyq atý boıynsha jarystar ótkizilip, jeńimpazdarǵa baǵaly syılyqtar tabystalady.
Dástúrli oıyn-saýyqtarmen qatar, bıyl elorda turǵyndary men qonaqtary alǵash ret robottar men jasandy ıntellekt elementteri bar erekshe ınteraktıvti aımaqtardy tamashalaı alady. Qonaqtar tsıfrlyq is-sharalarǵa qatysyp, ınnovatsııalardyń ulttyq dástúrlermen qalaı úılesetinin kóre alady.
Esil aýdanynda turǵyndar men qala qonaqtary EXPO aýmaǵynda jınalýda. Munda aýqymdy merekelik baǵdarlama ótip jatyr.
Bul jerde arnaıy alty taqyryptaǵy kıiz úı jumys isteıdi, olar zamanaýı tsıfrlyq tehnologııalardy qoldana otyryp bezendirilgen. EXPO aýmaǵy ulttyq etno-stılde shaǵyn sáýlettik formalarmen – taıqazan, arkalar, shańyraq, qobyz beınesindegi shatyrlar jáne qazaq mádenıetiniń basqa da elementterimen kórkemdelgen.
EXPO halyqaralyq kórme ortalyǵy aýmaǵynda ornalasqan «Zań men tártip» taqyrybyndaǵy kıiz úıi is-sharalardyń negizgi ortalyqtarynyń birine aınaldy. Munda kún saıyn aǵartýshylyq, ınteraktıvti jáne áleýmettik baǵyttaǵy sharalar ótedi. Baǵdarlama quqyqbuzýshylyqtyń aldyn alý, kıberqaýipsizdik jáne salaýatty ómir saltyn nasıhattaý baǵyttaryn qamtıdy.
Kelýshiler úshin QR-kod arqyly qoljetimdi oqý materıaldary bar kıbergıgıena boıynsha testileý, kıberqaýipsizdik pen nashaqorlyqtyń aldyn alý taqyryptarynda dárister, qazaq jáne orys tilderinde Kahoot vıktorınalary uıymdastyrylǵan. Sonymen qatar zamanaýı tehnologııalar kórsetilip, robot-ıt pen polıtsııa drony tanystyryldy.
Sondaı-aq, júzdegen qala turǵynynyń qolymen jasalǵan «Uly Dala Arýy» art-ınstallıatsııasyn kórýge bolady. Ol 3250 sharshydan jasalyp, Qazaqstannyń barlyq óńirin bildiretin 17 kún shapaǵyn quraıdy. Ár element jeke shańyraqty beıneleıdi.
Basty sahnada qazaqstandyq estrada juldyzdarynyń qatysýymen kontserttik baǵdarlama ótti.
22 naýryz kúni saǵat 12:00-de kontserttik baǵdarlama E-117 kóshesi, №37 úı mekenjaıyndaǵy «Baǵystan» turǵyn úı kesheniniń avtoturaǵynda da bastaldy.
EXPO halyqaralyq kórme ortalyǵynda (Máńgilik El dańǵyly, 53/1) otandyq óndirýshilerdiń qatysýymen «Naýryz bazary» azyq-túlik jármeńkesi ótip jatyr. Munda qazaqstandyq jetekshi brendter, onyń ishinde «Altyn sapa» syılyǵynyń qatysýshylary men jeńimpazdary óz ónimderin usyndy.
Ortalyq zalda «Jeti qazyna» ekspozıtsııasy, qyzǵaldaq kórmesi jáne Nauryz Kitap Fair kitap jármeńkesi ashylǵan.
Kelýshiler qazaqsha kúres, asyq atý, sadaq atý jáne arqan tartý sekildi ulttyq sport túrlerinen jarystarǵa qatysa alady.
Balalar úshin sheberlik saǵattary, shyǵarmashylyq sabaqtar men oıyn aımaqtary bar arnaıy art-keńistik uıymdastyrylǵan.
Nura aýdanynda buqaralyq is-sharalar «Astana Arena» stadıony mańynda ótip jatyr.
Munda Digital Nauryz taqyrybyndaǵy alty kıiz úı bar. Balalar men eresekterge arnalǵan attraktsıondar men ulttyq naqyshtaǵy fotoaımaqtar qarastyrylǵan.
Jasandy ıntellekt kómegimen ulttyq kıimderdi «kıip kórý» múmkindigi usynylyp, Face Space alańynda estelik sýretter jasaýǵa bolady. Sonymen qatar jergilikti kásipkerler men qolónershilerdiń ónimderi usynylatyn jármeńke aımaqtary jumys istep, qazaqstandyq estrada juldyzdarynyń qatysýymen kontsertter ótip jatyr.
22 naýryz kúni baǵdarlama sóıleý men ıntellekt damýyn anyqtaýǵa arnalǵan dıagnostıka jáne Naýryz taqyrybyndaǵy ınteraktıvti gologrammamen tolyqtyrylady.
Sol kúni saǵat 12:00-den bastap «Jaǵalaý» skverinde de osyndaı merekelik baǵdarlama ótip jatyr, onda jármeńke, kıiz úıler, mýzykalyq baǵdarlama jáne sporttyq is-sharalar uıymdastyrylady.
Saraıshyq aýdanynda «Qazaq eli» alańynda saǵat 11:00-den bastap kontserttik baǵdarlama ótip jatyr. Munda qonaqtar túıeli kerýendi tamashalap, qazaq dástúrimen tanysyp, fotosýretke túsip, demalys aımaqtarynda ýaqyt ótkize alady. Sondaı-aq gýmanoıd robot pen robot-ıt kórsetilýde.
22 naýryz kúni saǵat 11:00-de «Qazaq eli» alańynda qoshqar kóterý ulttyq oıynyna qatysýshylardy tirkeý júrgizildi.
Baıqońyr aýdanynda negizgi merekelik oryn – «Atatúrik» parki. Munda «Digital-Naýryz» ınteraktıvti aımaǵy jumys isteıdi. Qonaqtar jasandy ıntellekt kómegimen ulttyq kıimdegi tsıfrlyq portret jasap, ony QR-kod arqyly júkteı alady. Kelýshilerdi «Naýryzaı» jáne «Naýryzbek» atty AI keıipkerleri qarsy alyp, mereke dástúrleri men baǵdarlama týraly aqparat beredi.
Sondaı-aq «Berekeli ashana» jáne «Dám men dástúr» etno-kıiz úılerinde ulttyq taǵamdar usynylady.
22 naýryz kúni saǵat 12:00-de Baıqońyr aýdanyndaǵy Óndiris turǵyn alabynda (Aqbıdaı kóshesi, 6) ashyq aspan astynda kontsert ótti.
Almaty aýdanynda Astana Music Hall mańy, «Jeruıyq» parki jáne Temirjolshylar turǵyn alabyndaǵy Maıakovskıı skveri negizgi merekelik oryndarǵa aınalǵan.
Munda Digital Nauryz tsıfrlyq avatary bar kıiz úı jumys isteıdi. Bul vırtýaldy keıipker kelýshilerdiń Naýryz dástúrleri týraly suraqtaryna jaýap beredi. Sondaı-aq kelýshiler vırtýaldy tehnologııalar arqyly ulttyq merekeniń atmosferasyn sezine alady.
Kıiz úılerdiń birinde Face of Nauryz jobasy usynylǵan. Bul jasandy ıntellekt kómegimen kelýshiniń beınesin ulttyq stıldegi kórkem obrazǵa aınaldyryp, biregeı tsıfrlyq sýretter jasaıdy.
Sonymen qatar robot tehnıkasy qoldanylǵan ınteraktıvti oıyn aımaǵy bar, munda asyq atý oıyny zamanaýı formatta usynylǵan.
22 naýryz kúni saǵat 11:00-de «Jeruıyq» parkinde aýqymdy mereke bastalyp, 12:00-de kontserttik baǵdarlama ótti.
Alańnyń ereksheligi – tórt taqyryptaǵy kıiz úıden turatyn etnomádenı aımaq. Ár kıiz úıde ulttyq kıimder, salt-dástúrler, ádet-ǵuryptar men merekelik dastarhan tanystyrylady. Saǵat 12:00-den 14:00-ge deıin ár kıiz úı aldynda ulttyq rásimder kórsetiledi.
Sol kúni Temirjolshylar turǵyn alabyndaǵy Maıakovskıı skverinde saǵat 11:00-de merekelik baǵdarlama bastalyp, 12:00-de kontsert ótti.
Saryarqa aýdanynda da keń aýqymdy merekelik sharalar uıymdastyrylǵan. Munda VR-aımaǵy bar taqyryptyq kıiz úıler ornatylǵan. Arnaıy kózildiriktiń kómegimen qonaqtar Qazaqstan boıynsha vırtýaldy saıahat jasap, oıyndarǵa qatysa alady.
Kıiz úılerdiń ishi robot tehnıkasy men jasandy ıntellekt taqyrybynda bezendirilgen. Munda gýmanoıd robottar, onyń ishinde shapan kıip, bı bıleıtin robot ta bar.
Sondaı-aq fotobýdkalar ornatylyp, kelýshiler estelik sýretke túse alady.
Mereke aıasynda qazaqsha kúresten jarystar ótýde, oǵan kez kelgen adam qatysa alady.
Osyndaı baǵdarlama 22 naýryz kúni saǵat 10:00-de Qorǵaljyn skverinde jáne 11:00-de «Formýla ýspeha» turǵyn úı kesheni mańynda da bastaldy.
Eske salaıyq, «Naýryznama» onkúndigi aıasynda Astanada 200-den astam is-shara uıymdastyryldy.