Búgin elimizdiń úsh óńirinde jańartylǵan bes temirjol vokzaly ashyldy
ASTANA. KAZINFORM — Qostanaı, Atyraý jáne Batys Qazaqstan oblystarynda: Amanqaraǵaı, Qusmuryn, Ganıýshkıno, Aqqystaý jáne Semıglavyı Mar temirjol vokzaldarynyń qaıta jańǵyrtý jumystary aıaqtaldy, dep habarlaıdy Kólik mınıstrliginiń baspasóz qyzmeti.
Bul jumystar Memleket basshysy men QR Úkimetiniń tapsyrmasy boıynsha temirjol ınfraqurylymyn jańǵyrtý baǵdarlamasy aıasynda oryndaldy.
Qostanaı oblysynda Amanqaraǵaı (1961 jyly salynǵan) jáne Qusmuryn (1949 jyly salynǵan) vokzaldary jańartyldy.
Nysandarda ǵımarattar tolyǵymen qaıta jańartylyp, shatyrlar men ınjenerlik jeliler aýystyryldy, ishki jáne syrtqy árleý jumystary júrgizildi, zamanaýı jeldetý jáne órt dabyly júıeleri ornatyldy, irgeles aýmaqtar abattandyryldy.
Jolaýshylar úshin zamanaýı sanıtarlyq bólmeler jabdyqtalyp, vandalǵa qarsy kreslolar ornatylǵan, taktıldi navıgatsııa engizilgen jáne múmkindigi shekteýli azamattar úshin jaǵdaı jasalǵan.
Amanqaraǵaı stantsııasynda jaǵalaý perrony uzartylyp, jaryqtandyrý men jabyndy jańartyldy.
Óńirde 13 jolaýshylar poıyzy qatynaıdy. 2026 jyldyń basynan beri olardyń qyzmetin 92,3 myń jolaýshy paıdalandy.
Atyraý oblysynda Ganıýshkıno jáne Aqqystaý vokzaldaryn qaıta jańartý jumystary aıaqtaldy.
Nysandarda qasbetter men ishki úı-jaılar jańartylyp, ınjenerlik jeliler men shatyrlar aýystyryldy, jańa jıhazdar men jabdyqtar ornatyldy, irgeles aýmaqtar abattandyryldy.
Ganıýshkıno vokzalynyń aýdany 250-den 713 sharshy metrge deıin ulǵaıtyldy, Aqqystaý vokzaly 202-den 215 sharshy metrge deıin ulǵaıdy.
Oblys aýmaǵy boıynsha 9 jolaýshylar poıyzy júredi, 2026 jyldyń basynan bastap 253,8 myń jolaýshy tasymaldandy.
Batys Qazaqstan oblysynda qaıta jańartýdan keıin 1916 jyly salynǵan Semıglavyı Mar vokzaly ashyldy. Ǵımaratta jóndeý-qalpyna keltirý jumystary kesheni oryndaldy, ınjenerlik kommýnıkatsııalar jańartyldy jáne irgeles aýmaq abattandyryldy.
Oblysta 22 jolaýshylar poıyzy júredi, olardy 2026 jyldyń basynan beri 124,8 myń jolaýshy paıdalandy.
Barlyq jumys qazaqstandyq óndiristiń zamanaýı qurylys materıaldaryn paıdalana otyryp oryndaldy.
— Jańartylǵan vokzaldar qaýipsizdiktiń, qol jetimdiliktiń jáne jaılylyqtyń zamanaýı talaptaryna saı keledi. Jobalardy iske asyrý jolaýshylarǵa qyzmet kórsetý sapasyn arttyrýǵa jáne óńirlerdiń turǵyndary men qonaqtaryna qolaıly jaǵdaı jasaýǵa múmkindik berdi, — delingen mınıstrlik taratqan aqparatta.
Budan buryn jańǵyrtýdan keıin Almaty-1 jáne Almaty-2 vokzaldary qalaı ózgeretinin jazǵanbyz.
