Búgin elimizdiń shyǵysynda túnde 3 gradýsqa deıin úsik júredi
ASTANA. KAZINFORM – 4 qyrkúıekte Qazaqstannyń basym bóliginde jaýyn-shashynsyz aýa raıy kútiledi, al shyǵys óńirlerde túnde 2-3 gradýs úsik júredi, dep habarlaıdy «Qazgıdromet» RMK.
Sınoptıkterdiń málimetinshe, keń aýqymdy antıtsıklonnyń áserinen el aýmaǵynyń basym bóliginde jaýyn-shashyn bolmaıdy. Tek respýblıkanyń ońtústigi men ońtústik-shyǵysynda atmosferalyq fronttardyń ótýine baılanysty naızaǵaı oınap, jańbyr jaýady.
Respýblıka boıynsha jel kúsheıedi. Eldiń batysynda, ońtústik-batysynda jáne ońtústiginde shańdy daýyl kútiledi. Soltústik, shyǵys jáne ońtústik-shyǵys óńirlerde túnde jáne tańerteń tuman túsedi.
– Shyǵys Qazaqstan oblysynyń taýly aýdandarynda jáne Abaı oblysynyń shyǵysynda túnde 2-3 gradýs úsik kútiledi, – delingen «Qazgıdromet» boljamynda.
Sonymen qatar birqatar óńirde órt qaýpi joǵary bolady. Batys Qazaqstan jáne Qostanaı oblystarynyń soltústik-batysynda, Abaı oblysynyń ońtústiginde, Aqtóbe oblysynyń soltústik-shyǵysynda, Mańǵystaý jáne Qaraǵandy oblystarynyń ortalyǵynda, Jetisý, Almaty jáne Aqmola oblystarynyń soltústiginde joǵary órt qaýpi boljanady.
Qyzylorda, Túrkistan, Jambyl, Atyraý, Batys Qazaqstan, Aqtóbe jáne Ulytaý oblystarynda tótenshe órt qaýpi saqtalady.
Sondaı-aq Mańǵystaý oblysynyń batysy men soltústiginde, Qostanaı oblysynyń ońtústigi, ońtústik-shyǵysy men ortalyǵynda, Almaty oblysynyń batysy, shyǵysy men ortalyǵynda, Jetisý oblysynyń ońtústigi men shyǵysynda tótenshe órt qaýpi kútiledi.
Aıta keteıik, buǵan deıin elde aýa temperatýrasy 33 gradýsqa deıin joǵarylaıtyny málim bolǵan.
