Búgin elimizdiń ortalyǵy men soltústigindegi qalalarda aýa sapasy nasharlaıdy
ASTANA. KAZINFORM – «Qazgıdromet» RMK elimizdegi aýa sapasyna qatysty boljamyn jarııalady.
– 16 qarashada Qaraǵandy, Temirtaý, Óskemen, Semeı, Pavlodar, Astana, kúndiz Taldyqorǵan qalalarynda atmosferada lastaýshy zattardyń jınalýyna qolaıly meteorologııalyq jaǵdaılar kútiledi, – delingen habarlamada.
Qolaısyz meteorologııalyq jaǵdaılar – atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
Aıta keteıik, Qaraǵandy oblysynda ekologııalyq ahýal kúrdeli, aımaqta aýaǵa 293,7 myń tonna zııandy zat taraǵan.
Al Soltústik Qazaqstan oblysynda ekologııalyq talaptardy oryndamaǵan 16 sýbekt ákimshilik jaýapkershilikke tartyldy.
Sondaı-aq 31,8 myń gektar jerden kóterilgen shań Atyraýǵa qaýip tóndirip otyrǵanyn jazdyq. Sońǵy jyldary mundaı jaǵdaı jıilep ketti. Shańnyń negizgi kózi – ósimdik jamylǵysy sıregen, tuzdanǵan jáne usaq dıspersti gıps aralasqan qurǵaq jer.