Búgin elimizdiń qaı qalalarynda aýa sapasynyń nasharlaıtyny habarlandy
ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady.
«2026 jylǵy 15 qańtarda aýanyń lastanýynyń qolaısyz meteorologııalyq jaǵdaılary Petropavl, Pavlodar, Óskemen, Semeı, Rıdder, Almaty qalalarynda kútiledi», delingen habarlamada.
Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
Eske sala keteıik, 13 qańtar kúni Óskemen qalasynda ekologtar sary tústi qar jaýǵany týraly aqparat túsken soń tekserý júrgizdi. Tekserý qorytyndysyna súıensek, aýa arqyly shań men qum bólshekteri tóńirekke tarap, qardyń túsin ózgertip jibergen.
Al keshe elimizdiń búkil aýmaǵynda aýa raıyna baılanysty eskertý jarııalandy.