Búgin elimizde bes orman órti tirkeldi
ASTANA. KAZINFORM – Búgin, 27 shildede respýblıka boıynsha memlekettik orman qory aýmaǵynda 5 orman órti tirkeldi. Bul týraly Ekologııa mınıstrligi habarlady.
Óńirler boıynsha:
• Aqmola oblysynda – 2 orman órti;
• Shyǵys Qazaqstan oblysynda – 1 orman órti;
• Batys Qazaqstan oblysynda – 2 orman órti.
Qazir Batys Qazaqstan oblysynda bolǵan orman órtin oqshaýlaý jáne tolyq sóndirý jumystary jalǵasyp jatyr.
Órtti sóndirýge orman sharýashylyǵynyń, memlekettik orman kúzetiniń jáne tótenshe jaǵdaılar qyzmetiniń kúshteri men tehnıkalary jumyldyrylǵan.
Aqmola jáne Shyǵys Qazaqstan oblystarynda tirkelgen orman órtteri boıynsha barlyq qajetti kúshter men quraldar tartylyp, órt oshaqtary tolyq sóndirildi. Órt oshaqtary memlekettik orman kúzetiniń jerústi patrýldeýi barysynda der kezinde anyqtalyp, jedel áreket etý nátıjesinde olardyń keń aýmaqqa taralýyna jol berilmedi.
– Órt qaýipti kezeńde azamattardy tabıǵat aıasynda demalý kezinde jáne orman paıdalanýshylardy órt qaýipsizdigi talaptaryn qatań saqtaýǵa shaqyramyz, - delingen habarlamada.
Batys Qazaqstanda ormandaǵy órtti sóndirýge tikushaq tartylǵanyn jazǵan edik.
