Búgin eki qalanyń aýa sapasy buzylady
ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady.
— 7 qarashada Almaty, Taldyqorǵan qalalarynda atmosferada lastaýshy zattardyń jınalýyna yqpal etetin meteorologııalyq jaǵdaılar kútiledi, — delingen habarlamada.
Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
Aıta keteıik, búgin elimizdiń birqatar oblysynda tuman túsip, jańbyr men qar jaýady. Keı óńirlerde kóktaıǵaq bolyp, jeldiń ekpini sekýndyna 23-28 metrge deıin jetedi.
Buǵan deıin Ekibastuzda ekologııalyq talaptardy buzǵan kásiporyn 70 mln teńgege jýyq aıyppul tóledi.
Sondaı-aq Soltústik Qazaqstan oblysynda ekologııalyq talaptardy oryndamaǵan 16 sýbekt ákimshilik jaýapkershilikke tartyldy.
