Búgin eki qalada aýa sapasy tómendeıdi

ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady.

— 8 naýryzda Almaty qalasynda jáne túnde Atyraý qalasynda aýanyń lastanýynyń qolaısyz meteorologııalyq jaǵdaıy kútiledi, — delingen habarlamada.

Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.

Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.

Aıta keteıik, Shymkent elimizdegi aýasy eń kóp lastanǵan 10 qalanyń qataryna endi.

Búgin Qazaqstannyń barlyq oblysynda, sondaı-aq Astana, Almaty jáne Shymkent qalalarynda aýa raıyna baılanysty eskertý jarııalandy.