Búgin - Dúnıejúzilik sý resýrstary kúni
ASTANA. KAZINFORM - Búgin - Dúnıejúzilik sý resýrstary kúni. 1992-shi jyly BUU-nyń Qorshaǵan ortany qorǵaý jáne damytý jónindegi konferentsııasynda 22-shi naýryz - Dúnıejúzilik sý resýrstary kúni dep jarııalanǵan bolatyn, dep habarlaıdy QR Sý resýrstary jáne ırrıgatsııa mınıstrliginiń baspasóz qyzmeti.
Bul kúni biz tirshilik kózi bolyp tabylatyn sýdyń baǵa jetpes baılyq ekenin taǵy bir márte eske salyp, sý resýrstaryn saqtaý jáne ony tıimdi paıdalanýdyń mańyzdy jóninde oılanýymyz kerek.
«Sýdyń da suraýy bar» dep ósıet qaldyrǵan ata-babamyz bulaq kórse kóziń ashyp, tirshilik náriniń qadirin baǵalaı bilgen. Endigi bizdiń mindetimiz – osy sýdyń ysyrapshyldyǵyna jol bermeı, qolda bar resýrsty únemdep paıdalaný. Ol árbir tutynýshyǵa qatysty.
Osy maqsatta, Sý resýrstary jáne ırrıgatsııa mınıstrligi jańa Sý kodeksiniń jobasyn ázirledi. Jańa redaktsııada biz turaqty ekonomıkalyq damýdy qamtamasyz ete otyryp, Qazaqstannyń sý resýrstaryn keleshek urpaqqa saqtaý úshin naqty is-sharalar qabyldadyq.
Jańa Sý kodeksinde sý resýrstaryn tıimdi paıdalanýǵa, sý únemdeý tehnologııalary men sýdy qaıta paıdalaný júıelerin qarqyndy engizýge basymdyq beriledi. Al, sý salasyndaǵy buzýshylyqtar úshin jaýapkershilik zańnamalyq deńgeıde kúsheıtiledi.
Budan bólek, Úkimet bizdiń mınıstrlik ázirlegen QR sý resýrstaryn basqarý júıesin damytýdyń 2024-2030 jyldarǵa arnalǵan tujyrymdamasyn bekitti. Tujyrymdamada elimizdiń sý qaýipsizdigin qamtamasyz etý jáne sý tapshylyǵyn azaıtý maqsatynda 20 sý qoımasyn salý, 15 sý qoımasyn jáne 14 myń shaqyrymnan astam ırrıgatsııalyq kanaldy rekonstrýktsııalaý jáne gıdrotehnıkalyq qurylystardy jańǵyrtý boıynsha birqatar shuǵyl sharalar qarastyrylǵan.
Mınıstrlik sharýalardy sý únemdeýge jáne ony tıimdi paıdalanýǵa yntalandyrý baǵytynda da belsendi jumys istep jatyr. Máselen, Aýyl sharýashylyǵy mınıstrligimen birlesip sý únemdeý júıelerin ornatý shyǵyndaryn sýbsıdııadaý mólsherin 50%-dan 80%-ǵa deıin ulǵaıtý boıynsha jumys júrgizip jatyrmyz.
Búgingi tańda Qazaqstanda aýyl halqynyń 96,6%-y, qala turǵyndarynyń 98,9%-y ortalyqtandyrylǵan aýyz sýmen qamtamasyz etilgen. Mınıstrlik 2025 jyldyń sońyna qaraı qazaqstandyqtardy 100% sapaly aýyz sýmen qamtýdy josparlap otyr.
Mınıstrlik jumysynyń taǵy bir basym baǵyty - elimizde sý resýrstaryn uqypty paıdalaný mádenıetin qalyptastyrý.
Sýdy tek kásiporyndar men sharýalar ǵana emes, kez-kelgen qazaqstandyq únemdeýi tıis. Sol sebepti de sizderdi ortaq iske úles qosyp, sýdyń ár tamshysyna jaýapkershilikpen qaraýǵa shaqyramyn»,- dedi QR Sý resýrstary jáne ırrıgatsııa mınıstri Nurjan Nurjigitov.
