Búgin — BUU-nyń halyqaralyq bitimgerler kúni
ASTANA. KAZINFORM — BUU-nyń bitimgerlik mıssııalaryna 750-den asa qazaqstandyq áskerı qyzmetshi qatysty. Bul týraly Qorǵanys mınıstrliginiń baspasóz qyzmeti málim etti.
29 mamyr — qaqtyǵystardy retteýge jáne barynsha qaýipsizdikti qoldaýǵa, beıbitshilikti qurýǵa eleýli úles qosatyn BUU-nyń halyqaralyq bitimgerler kúni.
Qazaqstandyq áskerı qyzmetshilerdiń álemdegi beıbitshilikti qoldaýǵa qatysý tájirıbesi 2003 jyldyń tamyzynda birinshi ınjenerlik-saperlik «Qazbat» jasaǵynyń qurylýynan bastaý alady.
Qazaqstan úkimetiniń BUU-men bitimgerlik jelisi boıynsha ózara is-áreketi 2014 jyly Qarýly kúshterdiń alǵashqy áskerı qyzmetshisin Batys Saharadaǵy Uıymnyń áskerı baqylaýshysy retinde jibergen sátinen bastaldy.
— Osy kezden bastap qazaqstandyq bitimgerler Lıvan, Batys Sahara jáne Kot-d’Ivýar sııaqty álemniń ártúrli óńirlerinde qyzmet etti. 2024 jyly Qazaqstan BUU-nyń Afrıka men Taıaý Shyǵystaǵy mıssııasyna qosymsha áskerı qyzmetshilerdi jiberdi. Ásirese Ortalyq Afrıka Respýblıkasyndaǵy, Malıdegi jáne Kongo Demokratııalyq Respýblıkasyndaǵy mıssııalar kúrdeli boldy. Qazaqstan TMD-da BUU-nyń Golan jotalarynda qyzmet etýge derbes mandat alǵan alǵashqy jáne ázirge jalǵyz el bolyp tabylady. Búginde bizdiń 139 áskerı qyzmetshimiz qarsy taraptar arasynda atysty toqtatý rejımin saqtaý jóninde mańyzdy mindetterdi oryndap júr, — delingen habarlamada.
Vedomstvo málimetinshe, uıymnyń bitimgerlik kontıngentin óz betinshe ornalastyrý týraly sheshimi normatıvtik bazany damytý jáne áskerı qyzmetshilerdi daıarlaýdy jetildirý jónindegi júıeli jumystyń logıkalyq nátıjesi boldy. Bul úderiste bitimgerlerdi quqyqtyq, gýmanıtarlyq, tildik jáne psıhologııalyq daıarlaýmen qatar, jan-jaqty oqytýmen qamtamasyz etetin Almaty qalasynda Bitimgerlik operatsııalar ortalyǵyn qurý sheshýshi ról atqardy.
— Qazaqstannyń BUU-nyń bitimgerlik mıssııalaryna qatysýy halyqaralyq qaýipsizdikti nyǵaıtýǵa eleýli úles qosyp qana qoımaı, elimizdiń jahandyq arenadaǵy rólin arttyrýǵa yqpal etedi. Bul oǵan qosa qazaqstandyq áskerı qyzmetshilerge qundy jaýyngerlik tájirıbe jınaqtaýǵa, kásibı daıarlyqty jetildirýge jáne kópultty ortadaǵy is-qımyldarǵa beıimdelýge múmkindik beredi, — dep jazdy Qorǵanys mınıstrligi.
Birikken Ulttar Uıymynyń halyqaralyq bitimgerler kúni — qaza tapqandardy eske alyp, BUU-nyń álemdegi beıbitshilikti saqtaý jónindegi bitimgerlik operatsııalarynyń quramynda qyzmet etken hám qyzmet etýdi jalǵastyryp kele jatqan adamdarǵa qurmet kórsetetin kún.
Eske sala keteıik, buǵan deıin qazaqstandyq bitimgerler áskerı paradta júrip ótkenin jazǵan edik.