1 qyrkúıek — Bilim kúni
ASTANA. KAZINFORM — Búgin — Bilim kúni. Búgin 360 myń bala mektep tabaldyryǵynan alǵash ret attaıdy. Oqý-aǵartý mınıstri Ǵanı Beısembaev 6 tamyzda ótken úkimet otyrysynda osyndaı málimet keltirdi.
Mınıstrdiń aıtýynsha, 2025-2026 oqý jylynda elde 7859 mektep balalarǵa bilim bermek. Ǵanı Beısembaev onyń ishinde 6387 mekteptiń jaǵdaıy jaqsy ekenin aıtqan edi.
Mınıstrlik bergen keıingi málimet boıynsha 1 qyrkúıekten bastap eldegi 8 myńnan astam mektepte 4,1 mln bala bilim alady. Onyń 360 myńnan astamy birinshi synyp oqýshylary, 232 myńy 11-synyp túlekteri .
Al ákimdikter respýblıka boıynsha 1,7 mln balanyń mektepte ystyq tamaqty tegin ishýine qajetti qarajatty der kezinde bólgen. Bul byltyrǵydan 100 myń balaǵa kóp.
Ǵanı Beısembaev bul oqý jylynda 510 myń balanyń mektepke daıyndyǵyna ákimdik esebinen qoldaý bolatynyn aıtqan.
Al mınıstrliktiń 29 tamyzdaǵy málimeti boıynsha, «Jalpyǵa birdeı bilim berý qory» ata-analar men zańdy ókilderdiń esepshottaryna mektep formasyn, aıaq kıim men oqý-quraldaryn satyp alýǵa 25,3 mlrd teńge aýdarylǵan. Bul ákimdikterdiń tizimindegi 500 myńnan astam oqýshyǵa kómek kórsetildi degen sóz. Bıyl bir balaǵa beriletin eń tómengi tólem mólsheri 46 228 teńge bolyp otyr. Al jergilikti máslıhattardyń sheshimimen Almaty qalasynda bul soma 55 myń teńge, Jambyl oblysynda 53 117 teńge, Pavlodar oblysynda — 53 663 teńge bolyp belgilengen.
Jańa oqý jylynda el mektepterinde erekshe bilim berý qajettiligi bar balalarǵa arnalǵan 1093 qoldaý kabıneti jumys isteıdi. Bul kabınetterde psıhologtar, arnaıy jáne áleýmettik pedagogter, pedagog-assıstentter erekshe balalarǵa qolaıly jaǵdaı jasap, olardy mektep ortasyna beıimdeýge kómektesedi.
Jańa oqý jyly bastalǵanǵa deıin 163 bilim berý uıymynda jóndeý jumystary aıaqtalyp, 138 myńnan astam oqýshy jańartylǵan jáne tolyqtaı qaıta jabdyqtalǵan mektepterde bilim alady dep josparlanǵan bolatyn.
Renovatsııa baǵdarlamasy boıynsha 127 mektep jańartyldy. Onda 99 myńǵa jýyq bala bilim alady. Sonymen qatar 1 myńǵa jýyq aýyl mektebinde robototehnıka, hımııa, bıologııa, fızıka jáne STEM pánderi boıynsha 1108 zamanaýı kabınet ornatyldy.
2025 jyly balalardy qosymsha bilim berýmen qamtý 3,2 mln baladan 3,4 mln-ǵa deıin ulǵaıdy. Olardyń 62%-y tegin úıirmeler men sektsııalarǵa qatysady. Qazir respýblıka boıynsha 380 túrli baǵyttaǵy úıirme boıynsha qyzmet kórsetetin 2142 mektepten tys uıym jumys isteıdi.
Bıyl eldiń 12 óńirinde 22 oqýshylar saraıy salynyp jatyr. Ázirge Soltústik Qazaqstan, Pavlodar oblystary men Almaty, Shymkent qalalarynda nysandar qoldanysqa berildi.
Búkil el aýmaǵynda 267 myń balaǵa arnalǵan 232 mektep salynyp jatyr. Onyń 83 mektebi oqý jylynyń basynda, 111 mektebi oqý jylynyń aıaǵyna deıin salynyp bitý kerek.
«Keleshek mektepteri» ulttyq jobasy aıasynda 460 myń orynǵa arnalǵan 217 jańa formattaǵy mektep salynyp jatyr. Qazir sonyń 130-y ashyldy, olardyń 44%-y aýylda salynǵan.