Búgin bes óńirde orman órti tirkeldi
ASTANA. KAZINFORM - 2026 jylǵy 13 qyrkúıekte elimizdiń memlekettik orman qory aýmaǵynda 5 orman órti tirkeldi, dep habarlaıdy QR Tótenshe jaǵdaılar mınıstrliginiń baspasóz qyzmeti.
Óńirler boıynsha:
Almaty oblysy – 1 órt;
Shyǵys-Qazaqstan oblysy – 1 órt;
Qyzylorda oblysy – 1 órt;
Pavlodar oblysy – 1 órt;
Semeı ormany MOTR – 1 órt.
Orman órtteri memlekettik orman kúzetiniń baqylaýy jáne «Qazavıaormanqorǵaý» RMQK mamandarynyń áýe patrýldeýi barysynda der kezinde anyqtaldy. Órt týraly aqparat túskennen keıin qajetti kúshter men arnaıy tehnıka jedel túrde jiberildi.
Órtti sóndirý jumystaryna orman sharýashylyǵy mekemeleriniń qyzmetkerleri, Tótenshe jaǵdaılar departamentiniń bólimsheleri, sondaı-aq «Qazavıaormanqorǵaý» RMQK-nyń tikushaqtary men áýe desanttary jumyldyryldy.
Qazirgi ýaqytta órtti oqshaýlaý jáne tolyq sóndirý jumystary jalǵasyp jatyr. Órtke qarsy is-sharalardyń barysy Qazaqstan Respýblıkasy Ekologııa jáne tabıǵı resýrstar mınıstrliginiń baqylaýynda.
Osyǵan deıin Astanada salynyp jatqan turǵyn úıdiń shatyry órtenip jatqany týraly jazdyq.
