Búgin bes óńirde orman órti tirkeldi
ASTANA. KAZINFORM - 2026 jyly 13 tamyzda elimizdiń orman qory jerinde 8 orman órti tirkeldi, dep habarlady búgin QR Ekologııa jáne tabıǵı resýrstar mınıstrliginiń bapasóz qyzmeti.
Óńirler boıynsha:
Shyǵys Qazaqstan oblysy – 2 órt;
Qaraǵandy oblysy – 1 órt;
Qostanaı oblysy – 2 órt;
Kókshetaý MUTP – 1 órt;
Býrabaı MUTP – 1 órt;
«Semeı ormany» MOTR – 1 órt;
-Órt oshaqtary «Qazavıaormanqorǵaý» RMQK-nyń áýe patrýldeýi, erte anyqtaý júıeleri jáne memlekettik orman kúzetiniń turaqty baqylaýy barysynda der kezinde anyqtaldy. Órtti sóndirý jumystaryna memlekettik orman kúzetiniń qyzmetkerleri, «Qazavıaormanqorǵaý» RMQK-nyń áýe órt sóndirý desanttary, tikushaqtary, arnaıy tehnıkalary, sondaı-aq ózara is-qımyl aıasynda basqa da kúshter men quraldar jumyldyryldy,-delingen habarlamada.
Jedel ári úılesimdi is-qımyldyń nátıjesinde órtterdiń eldi mekender men orman alqaptaryna taralýyna jol berilmedi, órtterdi oqshaýlaý jáne sóndirý jumystary júrip jatyr. Jaǵdaı turaqty baqylaýda.
QR Tótenshe jaǵdaılar mınıstrligi órt qaýipti kezeńinde azamattardy órt qaýipsizdik sharalaryn qatań saqtaýǵa shaqyrdy.
Aıta keteıik, búgin Almatydaǵy qoımadan órt shyǵyp, ol tolyq sóndirildi.
