Búgin «Barys» Reseıde «Vıtıaz» komandasymen kezdesedi

ASTANA. KAZINFORM - Qazaqstandyq «Barys» komandasy búgin Qurlyqtyq hokkeı lıgasyndaǵy kezekti oıynyn Reseıde «Vıtıaz» (Podolsk) komandasyna qarsy ótkizedi.

Kezdesý búgin, 21 qyrkúıekte saǵat 21:00-de bastalyp, «Qazsport» telearnasynan tikeleı efırde kórsetiledi.

Eki komanda buǵan deıin 34 márte kezdesken. Onyń 22-i elordalyq klýbtyń basymdyǵymen aıaqtalsa, qalǵan oıynda reseılik komanda jeńiske jetken. Keıingi bes oıynda qazaqstandyq klýb atalǵan qarsylasyna ese jibergen.

Aıta ketsek, «Barys» elordada Reseıdiń «Neftehımık» (Nıjnekamsk), «Traktor» (Chelıabınsk), «Amýr» (Habarovsk), Belarýstiń «Dınamo» (Mınsk) komandalarynan jeńilip qalǵan edi.

Odan keıin Reseıde «Avtomobılıst» (Ekaterınbýrg) komandasyn overtaımda 2:1 esebimen súrindirse, «Ak Bars» (Qazan) klýbyna 0:5 esebimen ese jiberdi.

Endi qazaqstandyq komanda budan keıingi tórt oıynyn elordada ótkizedi. Aldymen 24 qyrkúıekte Reseıdiń «Dınamo» (Máskeý) klýbymen sheberlik baıqassa, 26 qyrkúıekte «Sochı», 28 qyrkúıekte «Vıtıaz» (Podolsk), 30 qyrkúıekte «Torpedo» (Nıjnıı Novgorod) komandalarymen kezdesedi.